DOW a neglisha peticion pa crea mas sitio pa tour bus

Un situacion casi similar di loke a sosode cu e sala di operacion na hospital a sosode cu e proyecto  Welcome  Plaza.  E asunto aki tin di haber cu area di parkeer destina pa e tour bus dilanti di e terminal di crucero. Ta asina cu a pesar cu peticion a wordo haci prome cu e proyecto a inicia pa destina mas sitio pa parkeer, esaki a wordo neglisha practicamente.

Aworaki cu e Welcome Plaza ta practicamente cla, e problema parti pafo di e operadonan di tour lo continua na entrada di e waf di crucero si no lo bin un solucion satisfactorio pa tur parti envolvi. Minister di Transporte, sr. Otmar Oduber a lamenta cu den henter planificacion no a tene cuenta cu e peticion cu tabatin di parti di Departamento di Transporte Publico (DTP) y di su ministerio mes. 

Solucion practico 

Minister di Transporte a bisa cu tin areanan rond di e terminal di crucero pa eventualmente ubica e tour bus, pero un factor cu e ta considera importante ta e parti practico y organisatorio. El a bisa cu tur cambio lo por trece mas gasto tambe si lo wordo destina otro area caminda e tour bus lo mester staciona. Pues e ta mira cu e echo cu no a wordo crea mas sitio pa e auto bus den e proyecto di Welcome Plaza, esaki lo trece cun’e cu organisatoriamente e lo bay trece mas gasto pa e organisacion di DTP y henter e control cu tin cu tuma luga.  

E mandatario a bisa cu normalmente den e area aki ta opera alrededor di 60 pa 70 bus. Pero a pesar cu a wordo indica esaki na DOW, solamente a wordo prepara luga pa 15 bus. Kiermen nan ta keda cu un problema cu nan tin cu busca un solucion practico y cu ta evita caos atrobe den e area importante aki pa nos industria turistico di crucero.

Diferente opcion 

Minister Oduber a señala cu actualmente nan ta ocupa buscando un solucion na e falta di sitio pa parkeer di auto bus. Pero unabes cu nan lo cuminsa opera fei di e sitio aki, director di DTP lo percura pa tin combersacion necesario pa bay bek den  parti di structura riba e cantidad di hende cu ta wordo transporta den bus. Tambe lo  bin bek riba e prijs cu a wordo fiha a base di loke a wordo acorda den combersacion cu tur e operadonan di tour bus. Pero e ta reconoce cu pa motibo di e cambio di structura cu a tuma luga sin tene cuenta cu e peticion di DTP prome cu e proyecto di Welcome Plaza a cuminsa, organisatorio y structural a bira imposibel pa continua cu e plannan inicial. 

Sinembargo minister Oduber a declara cu nan lo bay na e plan ey bek unabes cu lo tin un solucion pa e cantidad di tour bus cu mester para den e area aki. Encuanto e parkeerplaats situa den bisindario, e mandatario a indica cu esaki a wordo entrega na Aruparking pa su maneho. E no ta descarta e posibilidad aki pa aloca e tour bus cu ta opera den e area di terminal di crucero, pero e ora mester busca un solucion pa Aruparking.

Na final e mandatario a ratifica cu nan ta evaluando e diferente opcion pa wak cual ta e miho solucion pa e impasse cu tin na e momento aki. El a lamenta cu tur e cosnan aki por a wordo coregi y evita si totalmente a tene cuenta cu e peticion cu su ministerio y DTP a haci adelanta na e proyecto.