Durante un recorido cu redactor di Bon Dia Aruba a haci fin di siman ultimo, por a mira cu ciudadanonan keto bay ta sigui laga atras cantidadnan di sushi causando mini dump ilegal na varios caminda.
E biaha aki, ta trata di un caminda di tera cu ta cerca di Cascabel Airfield na San Nicolas e cual por a conta un cantidad no menos cu 5 mini dump ilegal. Aki por a mira hasta facturanan cu nomber y fam di algun persona; sinembargo, esey no ta duna un indicacion cu e persona ey por ta esun cu a benta e sushi den area ey.
Un tiki mas leu a wak un parachute cu por a pertenece na un compania di water sports y debi na su mal estado, nan a bent’e afo lagando mas sushi den e luga manera life jacket, tambe den mesun caminda pero cu un distancia entre un dump y otro, por a compronde cu a haci un cas limpi sacando afo tur loke no tabata sirbi of usa mas y nan tir’e den luga aki, manera un fem, un WC, co’i hunga di muchanan, stoelnan, entre otro.
Dia 17 di januari ultimo, minister di Naturalesa y Medio Ambiente, Ursell Arends, a informa cu diabierna 12 di januari nan a reuni cu Bureau City Inspector unda nan a informa ariba e diferente accion di limpiesa cu nan tabata tin y cu nan tin den plannan. Nan ta bin haciendo nan trabounan for di comienso di aña na varios caminda y BCI ta keda monitor esaki mirando cu un hende ta sigui busca luganan pa laga sushi atras, loke ta un problema social mirando cu e comunidad mes ta responsabel pa e sushi aki.
“Un tristo realidad pa mira con nos hendenan bibando riba nos dushi Aruba ta dicidi pa actua,” minister Arends a sigura.
