Recientemente Luna Foundation Aruba a publica riba nan Facebook cu nan ta buscando un ayudante, cu urgencia, pa traha riba e tereno di e fundacion. Reportero di Bon Dia Aruba a acerca presidente di e fundacion, Zoey Konijn pa puntra mas informacion y kico ta e rekisitonan pa por aplica pa e trabao.
Konijn a indica cu en berdad nan ta buscando un ayudante pa traha riba e tereno pa motibo cu su persona a kibra su pia y pa e motibo aki no por traha riba tereno. Nan ta buscando boluntario of un hende cu kier traha riba tereno pa un salario.
“Mi sa cu tempo ta dificil. Nos a haya dos sponsor cu kier paga e persona 10 dollar pa ora durante dos luna. E trabao lo ta cinco ora pa dia, dos biaha pa siman. Si tin hende cu kier haci trabao boluntario, nan ta mas cu bon bini,” el a splica.
Pa motibo cu e mes no por traha riba tereno durante luna di maart, y pa ta sigur nan a inclui luna di april tambe, nan ta buscando un ayudante pa tuma over dos di e shiftnan cu Konijn ta traha normalmente riba tereno, cual ta riba diamars y diahuebs for di 9or di mainta te 1:30 di atardi.
El a enfatisa cu e persona cu kier traha mester ta un hende cu ta stima bestia y no tin miedo di bestia of cu nan no sa con pa atende cu nan. “Bo no por bin ki riba si bo tin miedo, mi tin 150 cacho y si bo tin miedo di cacho bo no por traha cu nan. Tambe ta importante pa e persona tin amor pa bestia y pasenshi,” el a remarca.
El a splica cu e trabao ta encera haci e haula di e cachonan limpi y p’esey ta hopi importante pa e persona cu kier tuma e trabao ta un persona cu tin stoma fuerte, ya cu e lo haci e haulanan limpi, recoge pupu di cacho, y tambe duna e cachonan cuminda, awa, laga na core y despues hinca nan den haula back.
Cualkier persona cu ta interesa por tuma contacto cu e fundacion via whatsapp na e number 5636567, via email lunafoundationaruba@gmail.com of via nan pagina di Facebook.
