Recientemente nos tabatin den corte e caso entre e entidad Ducapro, estableci na Corsou, y un emisora radial (Hits 100.9 FM), encuanto e pago di regalia (royalties) pa uso di musica di artista, di exterior como tambe local. Punto di debate tabata entre otro si e emisoranan lo mester paga esaki na Ducapro, y si e suma exigi tabata hustifica. Huez a dicta provisionalmente cu e ta haya cu pago pa uso di material di artista ta hustifica, y cu e dos partidonan mester bay negocia, durante un periodo di dos luna, pa yega na un acuerdo tocante un suma cu mester paga. Si no tin un solucion entre nan, huez mes lo dicta kico lo ta un suma husto.
Ken ta Ducapro?
Ducapro ta un fundacion lanta y registra na Corsou, cu tin como obhetivo haci negoshi cu patent, licencia, convenio, etc. Lo tin un descripcion mas detaya pero esaki ta loke ta aparece riba website di Camara di Comercio na Corsou. Den e caso particular aki nan ta involucra den cobramento di royalties pa artista, principalmente musico. Esey no ta e problema, pero tin mas detaye pa atende. E fundacion tin solamente dos miembro di directiva, esta un persona natural estableci na Corsou, y un compania di abogacia estableci na Bonaire, yama Bonaire International Lawyers B.V. E empresa aki ta opera tambe bao di e nomber comercial Davidkock Legal. Si nos no ta equiboca, esaki ta liga anto na e bufete conoci na Aruba, cu por cierto ta atende e caso di Ducapro den corte.
Den loke a sali publica nos ta observa cu ta papia di un relacion di Ducapro cu e organismo Hulandes BumaStemra, cu ta representa y ta cobra pa artistanan Hulandes di e mercado cu ta usa nan producto. Sin embargo, Ducapro no ta aparece riba e lista di organismo den exterior cu cual BumaStemra ta asocia. Esun cu si ta aparece ta e organismo Canades Socan, cu cual Ducapro lo tin un convenio di colaboracion pa e islanan Hulandes den Caribe.
Mientras e caso ta den corte, unda huez a dicta un periodo di negociacion pa e partidonan yega na un acuerdo tocante e suma cu mester paga, ta surgi bastante pregunta tocante algun asunto clave. Por ehemplo, con asunto di representacion ta regla y ki garantia tin cu recursonan ta yega na e beneficiarionan final, esta e artistanan local y den exterior. Na Hulanda por ehemplo, BumaStemra ta organiza na diferente nivel; e ta di un banda un asociacion (vereniging) di cual artista por bira miembro, y tin dos nivel di gerencia y supervision cu ta envolvi den cobranza y administracion di recurso. Via e entidadnan asocia ta percura tambe pa paga e royalties cu ta coresponde na artista den otro pais. Pero, con esaki ta regla cerca nos? Aparentemente no tur cos a keda cu e claridad suficiente den corte, pasobra den un articulo den e medio aki di dia 29 di februari, abogado di e emisora involucra den e caso ta haci e pregunta: “Mester paga, pero ken (nos ta paga)?”
Ta logico cu den e caso aki esun cu ta desea di cobra, ta pretende di tin e asunto bon regla. Tin un acuerdo cu un asociacion local di artista, tin un acuerdo cu un organismo di Canada, cu ta colabora cu BumaStemra. E problema ta parce nos cu na e islanan mes no tin un organismo, manera na Hulanda, cu ta un asociacion di cual artista por bira miembro, y cu ta obliga anualmente di duna cuenta na nan miembronan di e trabao haci, y di e beneficionan logra pa e artistanan. E problema aki ta parce nos cu e organismo clave intermediario ta un fundacion, cu pa ley no por tin miembro y cu por lo tanto no tin e obligacion di transparencia y di duna cuenta cu un asociacion tin. Ken ta bay averigua anto cuanto recurso e fundacion a haya, cuanto a keda atras como gasto di operacion, etc.?
Di un banda nos ta comprende cu e fundacion y e empresa na Bonaire ta organiza asina. Di e forma aki por evita cualkier penetracion di otronan den e fundacion y tambe ta limita gasto di abogado pasobra ta e compania na Bonaire mes por entama e casonan den corte pa e fundacion. Di e manera aki por hiba hopi caso hudicial, sin yega na gasto halto di abogado; ‘smart business thinking…’ Sin embargo, e forma di opera aki no ta duna e tipo di confianza y transparencia cu e organismo menciona Buma Stemra ta duna na Hulanda. Ta parce nos cu e fundacion na Corsou tin un autoridad ‘autoproclama’ cu no a haya clarificacion suficiente ni den publicidad, ni tampoco den corte. Di e banda aki mester duna e radioemisora razon den nan argumento cu nan ta desea di sa ta ken nan mester paga. Un persona huridico manera un fundacion, cu tin un directiva explicitamente ‘cera’ pa evita ‘asalto’ externo riba e persona huridico, no ta parce nos e vehiculo adecua pa ta e intermediario pa e beneficiarionan. E pregunta clave ta keda: con ta controla cuanto berdaderamente lo yega na man di e artistanan? Nos tin e impresion cu e asunto aki, di banda di e fundacion, a cuminza riba un pia robez, optando pa un forma legal cu ta garantiza operacion agil y confidencial, pero esey no necesariamente ta cuadra cu e transparencia cu mester tin pa e partidonan involucra, artista y usuario por igual. Na huez pa dicidi con ta sigui.
