Mediante acuerdo ta bay reforsa e prome linea di cuido cu 10 POH pa dokternan di cas

Ayera atardi diferente instancia enfoca riba cuido medico na Aruba a informa tocante e ampliacion di contracto di personal di POH ademas di e introduccion den praktijkondersteuners specialisa den Salud Mental, esaki a conta cu e presencia di minister di Salud Dangui Oduber, director di AZV Edwin Jacobs, director di Stichting Wit Gele Kruis Carlos Goeloe y presidente di sindicato AVB di hospital Gina Maduro.

Esaki tabata un momento importante pa cuido medico na Aruba na unda a informa comunidad tocante e continuacion di e contracto entre Organo Ehecutivo AZV y Stichting Wit Gele Kruis Aruba, esaki ta trata di e ampliacion y e continuacion di praktijkondersteuners miho conoci como POH, adicionalmente nan a informa cu nan ta na caminda pa introduci e praktijkondersteuners specialisa riba tereno di salud mental conoci como geestelijke gezondheidszorg ‘GGZ’ cu na 2012 pa prome biaha a cera conoci cu e praktijkondersteuners y ayera 12 aña despues AZV ta orguyoso di e trabao cu nan a logra y a bisa cu nan lo sigui inverti den su hendenan.

E trabao di POH ta enfoca riba prevencion y nan ta situa na 33 dokter di cas rond di Aruba y 27 di nan ta asisti e dokternan di cas, nan trabao ta cu nan ta purba di atende e pashentnan cu ta sufri di diabetes, problemanan cardiovascular of otro malesanan cronico, nan tambe ta yuda pashentnan pa nan por tuma un estilo di bida mas saludabel, awor algun praktijkondersteuners ta bay yuda den e parti di salud mental cu e mesun structura y cu na momento cu tin un pashent cu ta bay na su dokter di cas y ta bis’e cu e ta sinti algun problemanan cu ta concerni salud mental, en bes di e dokter warda pa manda un pashent pa un psicologo of un psikiatra, e por mand’e di biaha na e PHO di GGZ cu lo traha un afspraak den un tempo cortico pa asina atende cu e pashent aki.

Di su parti minister di Salud, Dangui Oduber, a trece dilanti cu nan ta hopi contento di por firma un acuerdo entre AZV y Wit Gele Kruis pa fortifica e prome linea di cuido medico na Aruba, “nos maneho y vision ta pa nos mehora e calidad di cuido y servicio y percura pa haci inversionnan continuo den cuido medico pa asina nos por garantisa cu e fondonan ta AZV ta keda sostenibel y tambe garantisa cu por keda ofrece e mesun pakete di seguro cu ta amplio pa nos aseguradonan,” minister a bisa.

Di e forma aki tambe ta bay aumenta e cantidad di dokternan di cas pa asina baha e cantidad di asegurado di cada dokter, nan ta bay crea mas cupo di studio pa dokter di cas na ImSAN cu e huisarts opleiding y awor nan ta bay amplia e cantidad di POH na e praktijkondersteuners na dokternan di cas cu 10 POH extra pa baha e presion cu dokternan di cas tin y asina ofrece un miho servicio, tambe nan ta bay haci un otro inversion pa assistentnan di dokternan di cas.

E acuerdo di ayera ta encera cu nan ta bay financia e completacion di studio di 7 POH cu tin actualmente na e modulonan di cuido di adulto mayor y promocion di salud.

Dokter Joaquin van Trigt di Huisartsen Vereniging Aruba (HAVA) a splica cu esaki ta un bon noticia pa nan ya cu e trabao y e responsabilidadnan di dokternan di cas a crece hopi den ultimo añanan unda cu nan ta haci hopi mas no solamente pa e parti di cuido sino tambe di management, nan a ripara cu e tempo cu nan ta dedica na cada pashent a baha, “p’esey nos mester mas di man y pia afo, pa yuda nos señala ora tin problema y nos por target e problema mas eficientemente, praktijkondersteuner ta haci specificamente esey, e ta traha den nos praktijk, e ta parti di nos personal aunke e ta pertenece na WGK, nos tin coordinacion, nos tin consulta tur dia over di nos pashentnan y e miho parti ta cu e ta dedica su tempo na cada pashent cu tin malesa cardiovascular y awor tambe lo bin na e pashentnan cu ta sufri di salud mental.”

Carlos Goeloe Stichting Wit Gele Kruis a menciona cu 12 aña pasa Wit Gele Kruis y su persona mes a kere cu mester bin cu un cambio, e tempo ey nan a cuminsa cu 3 persona como POH como proyecto di AZV caminda nan a bira mas formal na Aruba.

“Awor 12 aña despues por bisa cu esaki ta un exito rotundo, pasobra Boneiro y Corsou tambe tin nan POH caminda nan a copia loke Aruba ta haciendo, un huisarts ta un drempel pero ora ta trata di e parti mental tin biaha e hendenan tin berguensa, tin un tabu den psikiatria y mi ta kere cu e POH nos por centralisa e pashent miho y por yud’e mas lihe cu su salud mental,” Goeloe a señala.

Gina Maduro di sindicato AVB a señala cu PHO tin un funcion hopi importante y nan ta e wowo extra di e dokter di cas, un sosten pa e parti di prevencion y cu e 27 POH cu tin awor mas esnan cu ta falta por fortifica e parti aki na unda cu e aseguradonan por haya calidad den servicio.

Pa finalisa, Edwin Jacobs director di AZV a señala cu nan ta bay fortifica e cuido den e proximo añanan y den acuerdo di salud tabatin e fortalecemento di cuido den e prome linea, “nos ta mustrando e compromiso di AZV, nos ta poniendo e suma pero e trabao dificil ta na Wit Gele Kruis aworaki pa recluta e profesionalnan, nos sa cu no ta facil den e temponan aki pa haya profesionalnan, POH a bin pa keda y esey ta nifica cu nos tin mester sigui inverti den nan y nos mester keda cu e oido pa trahadonan den cuido den e espacionan financiero cu nos tin,” el a comenta.