Mediante un post di Aruba Birdlife Conservation (ABC) ta ilustra e movecion cu tin den un beach ubica cerca di Eagle Beach, na unda a cuminsa pone palapa y prepara e tereno pa asina haciele mas atractivo pa turistanan por disfruta di dje.

Na augustus 2023, minister di Naturalesa, Ursell Arends a informa cu nan como Gobierno tabata considerando un otro opcion cu a propone na e desaroyado di Embassy Suites, ya cu e aanlegvergunning pa crea un beach dilanti Embassy Suites door di e desaroyado Natura N.V tabata uno relevante, na unda cu 23 di juni 2023 Fundacion Aruba Birdlife Conservation (ABC) a solicita hues pa stop e proyecto di beach pa Embassy Suites y corte a honra e peticion aki.

Minister Arends a declara cu na e momentonan ey, departamentonan di Gobierno di Aruba envolvi cu e caso aki tabata bezig ta procesando e peticion di ontheffing y alabes tabata considerando un otro opcion cu a propone na e desaroyado; y manera minister Arends a sigura, nan tabata spera cu den un tempo corto nan lo a yega na un solucion.

Ayera Bon Dia Aruba a haya e confirmacion cu e hotel a haya un precario vergunning cu ta un tereno pa haci uso di beach cu watersports. Esaki no ta trata di e mesun tereno cu tabata den disputa legal tempo pasa, sino un otro beach cu ta keda band’i dje, denomina como “Juanita Beach” y cu no tin proteccion di ROPV. Aruba Birdlife Conservation a destaca cu “ta un permiso ‘precario’ concedi pa minister di Infrastructura na e area yama ‘Juanita Beach.’”

Igualmente, Bon Dia Aruba a tuma contacto cu e minister encarga cu e cartera di Infrastructura, cu ta prome minister Evelyn Wever-Croes, ken for di Brussels, unda e ta na e momentonan aki, a sigura cu “ami no ta duna precario vergunning. Mi a depolitisa e proceso y DIP ta encarga cu e proceso completamente. Nan no mester raporta na mi tampoco. Mientras tanto, mi a puntra a Raiz di bo pregunta y nan a confirma mi cu e compania a haya un precario,” el a sigura.

Mientras tanto, ABC a sigura cu te ainda nan ta den proceso di apelacion pa e caso aki.

Potretnan ta di ABC su Facebook Page.