Ayera mainta durante un conferencia di prensa di gobierno Minister di Husticia y Asuntonan Social, Rocco Tjon, a anuncia e lansamento di e campaña nacional pa seguridad den trafico, campaña “Trafico Sigur”, cu lo enfoca ariba eleva seguridad den trafico.

Minister Tjon a indica cu añanan anterior e cadena hudicial a enfoca hopi ariba e delitonan di alto impacto, y cu presentacion di tur e cifranan aki tambe, por a wak un reduccion significante pa loke ta criminalidad na Aruba.

El a menciona cu dos siman pasa un investigacion imparcial a tuma luga cu a duna como resultado cu Aruba ta e pais mas sigur den Caribe.

E mandatario remarca cu a aworaki e cadena hudicial ta bay pone tur nan forsa hunto pa percura pa eleva seguridad den trafico a traves di e campaña nacional aki cu ta bay enfoca riba diferente aspecto. E campaña ta ranca sali dia 1 di maart y tin como meta mehora seguridad den trafico, reduci e accidentnan y salba bida.

Minister Tjon a señala cu na aña 2022 Aruba a conoce 7.341 incidente pa loke ta trata trafico y den tur e incidentenan aki tabatin un total di 13.069 persona envolvi.

“Mi ta kere tur hende ta compronde e impacto cu esaki tin riba Aruba, riba e seno familiar, riba nos economia. Nos ta papia di perdida di bida cu ta afecta salud di famianan, personanan. E ta afecta e situacion financiero di cada hogar, pero obviamente e ta afecta e parti di empleo tambe pasobra ora un persona ta envolvi den un accidente e no por bay traha y tin consecuencia pa e famia, pero tin consecuencia pa empresario tambe. E ta punto cu nos mester duna atencion,” el a subraya.

E mandatario a splica cu na december aña pasa gobierno a inicia e proceso caminda nan a acerca diferente compania pa duna nan oferta pa yuda e cadena hudicial ehecuta e proyecto aki. E compania ganador ta bay duna conseho na gobierno durante un aña largo pa asina por ehecuta e proyecto aki.

El a agrega cu tin un comision tambe cu a wordo institui, comision trafico sigur. E comision aki tin representacion di Cuerpo Policial den dje, e compania ganador, di Ministerio Publico, di Ministerio di Husticia y Asuntonan Social y tambe di e companianan di seguro pa atende cu tur aspecto cu tin di haber cu e fenomeno aki.

E comision aki a bin ta reuni ya caba for di januari den un forma structural pa por presenta e campaña nacional aki cu ta cuminsa dia 1 di maart.

Minister Tjon a indica cu e campaña trafico sigur ta bay enfoca riba educacion y conscientisacion, pa educa pa asina por preveni accidentnan den trafico. E enfoke, el a señala, lo ta riba velocidad halto, core bao di influencia y distraccion den auto, manera por ehemplo uso di celular.

Banda di esaki, el a agrega, gobierno ta bay lansa un website, traficosigur.aw. El a sigui splica cu riba e website aki tur informacion lo ta disponibel y e ta bay conta tambe cu un seccion interactivo caminda tur persona por haci nan pregunta y ricibi nan contesta pa duna contenido real na e parti di educa y conscientisa y preveni accidentnan di tuma luga.

“E ta bay conta cu participacion di pueblo. Ta bay tin diferente encuesta cu lo wordo lansa riba e website aki pa di e forma ey tin participacion di comunidad tambe y nan tambe por señala situacionnan di trafico cu nan ta considera peligroso y di e forma ey nos ta percura pa nos enfoca riba e situacionnan ey pa preveni accidentenan di auto,” el a resalta.

El a agrega cu ta bay tin tambe diferente mensahe ta bay wordo emiti durante full un aña largo a traves di tur e canalnan tradicional cu ta trata media.

Minister Tjon a indica cu apart di enfoca ariba e parti di conscientisacion y prevencion, el a resalta cu di otro banda ta importante tambe pa percura pa e parti di controlnan tuma luga.

El a splica cu hunto cu e proyecto aki, na mesun momento, a base di diferente otro decision tuma for di e parti di husticia, hunto cu Cuerpo Policial a dicidi cu ta bay emiti un kalender interno pa loke ta trata tur e diferente control di trafico cu lo bay keda tuma luga na un manera structural.

E mandatario a sigui splica cu nan a tuma e decision tambe pa amplia e capacidad pa loke ta trata e Unidad Motorisa di Cuerpo Policial. El a indica cu nan ta bay haya tur persona cu tin mester pa tur e motornan cu e unidad ta dispone di dje tambe por wordo usa pa garantisa mas seguridad den trafico.

Di otro banda, e mandatario a agrega, Ministerio Publico ta bay haya mas personal. El a splica cu a tuma e decision pa tuma tres persona extra specificamente pa por procesa tur e boetnan cu ta wordo skirbi door di Cuerpo Policial y nan ta bay crea tambe mas zittingscapaciteit na corte.

Minister Tjon a menciona cu aworaki tin 300 caso pendiente di 2022 y 2023 pa loke ta trata specificamente core bao di influencia. El a indica cu ya caba dos siman pasa nan a reuni cu presidente di Corte Comun y a dicidi cu ta bay percura pa mas personal pa corte pa haal in e 300 caso cu tin pendiente.

El a anuncia cu aña aki tambe gobierno ta bay introduci un proyecto piloto titula ‘snelrecht’. Esaki kiermen cu tur persona cu comete un infraccion pa loke ta trata trafico, despues di un periodo cortico, e caso lo wordo presenta dilanti hues.

Por ultimo Minister Tjons a splica cu nan ta bay facilita Cuerpo Policial su trabao pa entre otro kita vehiculonan cu no ta cumpli cu tur rekisito for di caminda.

“Nos tin e proyecto di opslagbewaring y takeldienst pa KPA. Den luna di maart tur compania cu ta interesa por entrega nan oferta y di e forma aki un decision ta bay wordo tuma pa wak cua compania ta gana esaki pa asina 24 ora pa dia tin takelwagen disponibel pa e agentenan policial por kita vehiculonan di caminda. Na mesun momento tin un tereno grandi cu ta bay wordo prepara pa tur e vehiculonan aki por wordo staciona eynan y e compania aki lo maneha full e proceso den nomber di Gobierno di Aruba,” el a finalisa.