“Yuda esnan cu tin mester di dje no solamente ta parti di deber, sino di felicidad,” ta un frase di e poeta y filosofo Cubano, Jose Marti, cu ta describi loke algun hende cu ta eherce e funcion di boluntario ta sinti, specialmente un di nomber Cristian Perez, miho conoci cu su di dos nomber, “Nathan Perez.”

Nathan tin e boluntariado den su curason y den su mente semper. Den un entrevista special cu Bon Dia Aruba, el a conta cu e ta un Arubiano bibando na Hulanda for di aña pasa pa motibonan di su estudio di Management and Organization, pero semper e tabata participa den diferente organisacion y eventonan como den Festival di Himno y Bandera; y tambe como boluntario for di 2018 aproximadamente, unda cu el a cuminsa bira mas activo cu fundacionnan mes, trahando cu hobennan manera e, cu tin 20 aña di edad.

Esun cu a dun’e e prome parti di su experiencianan tabata Parlamento Hubenil. “Mi ta kere door di nan, hopi porta a wordo habri cu otro fundacionnan. Bo ta conoce mas hende, bo ta cuminsa uni na otro organisacionnan,” el a bisa. Di esaki, el a afirma cu el a gana e premio di “Boluntario di Aña” na 2020 na Parlamento Hubenil.

Despues di esey el a drenta den Heart-Centered Leadership Foundation. Tambe den un temporada el a cuminsa yuda CEDE cu un proyecto di Elsa Krozendijk yama “Pitch Time Aruba,” cu tabata e programa pa hoben cu kier bira boluntario of forma parti di un organisacion social y haci impacto na Aruba y tabata cay bao di CEDE Aruba.

Na aña 2020, varios persona, sin cu e tabata sa, a nomina Nathan na e premio Poder di Hubentud di Asociacion Trabao di Hubentud Aruba (ATHA). “For di chikito caba mi tabata gusta yuda. Na scol mi tabata yuda mi juffrouw den cosnan chikito y semper mi tabata gusta y tabatin interes pa esey, for di un edad trempan m’a ripara esey,” e ta conta.

Hasta su prome trabao, manera e ta conta, el a hay’e door di ta boluntario. Esaki tabata den temporada di pandemia di Covid-19 unda el a cuminsa yuda Fundacion pa Nos Comunidad, cu ta e unico food bank na Aruba. Y despues di un vakantie grandi di scol, su mes a opta pa cuminsa studia den oranan di anochi un AVOND-HAVO y na e momento ey, Nathan por a tuma e trabao y haciele full-time.

Aworaki cu e ta na Hulanda, Nathan tin den mente continua cu e bunita labor aki y ta bezig buscando informacion di esey pa esaki tambe por forma parti di su bida nobo, cu experiencia di otro pais y conoce mas hende.

Riba e pregunta kico ta loke a hala atencion pa bira boluntario, Nathan a contesta cu nunca el a pensa riba pakico e ta haciendo esey. “Mi ta kere, si mi ta sinta pensa un rato, e tin hopi di haci cu ora bo ta haci algo sin intencion cu mester haya algo back. E satisfaccion cu bo ta haya di por yuda hende cu ta den necesidad por ehemplo, na Fundacion pa Nos Comunidad, cu bo ta haci e famia un tiki miho di loke e ta, e ta yena bo cu satisfaccion y trankilidad cu bo a haci algo cu tin un bon consecuencia pa un famia na final di dia.”

Den su opinion, Nathan ta para semper pa e participacion di hobennan, vooral den aspecto cu mientras mas hoben e ta, mester cuminsa vocifera nan opinion y nan pensamentonan ariba diferente tema. Involucra hoben ora cu por ehemplo gobierno of instancianan grandi ta papia di temanan cu tin relacion cu hobennan. “Awendia hopi hoben no tin mucho interes di bira boluntario, pasobra e no ta algo mucho popular. Pero si mi tin cu bisa cu den ultimo organisacionnan cu mi tabata, mi a wak mas participacion di hobennan, e grupo no ta grandi pero tiki tiki bo ta wak cu mas hoben ta uni na organisacionnan.”

Si e tin cu duna un conseho, Nathan a bisa cu “haci algo boluntario no ta algo cu bo ta sinti obliga pa haciele, e mester ta algo cu tambe ta den bo interes. Bo tin cu haciele echt di curason, e ta nace di bo mes.”

Nathan a bin Aruba un tempo di vakantie, el a bin traha y yuda den parada di Carnaval cu planeamento, organisacion di parada cu participacion dinamico di e radio “XFM.” Pa su persona e ta considera e parti ey un parti unda e por gasta su energia den dje y e ta sintiele great cune, manera e ta comenta.

“Just haci algo boluntario cu bo ta sinti comodo na dje y no ta algo cu ta haci sinti bo obliga di haci,” el a finalisa.