(Infobae) – Un multitud a reuni ayera diadomingo na Sao Paulo convoca pa ex-presidente Jair Bolsonaro, cu e acto aki e ta busca rechasa e sospechonan golpista den su contra y duna un demostracion di forsa como lider di oposicion.

Miles di siguido bisti di berde y geel a cuminsa yega for di mainta na Avenida Paulista na unda e hefe di estado a convoca un marcha.

E ex-mandatario a señala cu “ta bay ta un manifestacion pacifico den defensa di Estado di derecho democratico,” segun el a sigura den varios video publica riba su rednan social pa mobilisa su siguidonan.

Tambe, el a sigura cu e ta pretende defende su mes di “tur acusacion” den su contra, incluyendo e sospecho di lo a participa den un plan di golpi di Estado pa e por mantene su mes den e poder, despues di su derota electoral frente a Luiz Inacio Lula da Silva na october 2022.

Entre e multitud reuni na Sao Paulo tabata Wilson Aseka, ken a biaha casi 700 kilometer di e estado bisiña Minas Gerais, “Bolsonaro ta un persona honesto, victima di un persecucion,” e constructor di 63 aña cu un bandera di Brazil colga riba su nek a bisa.

“Ta importante pa apoy’e pasobra e ta representa Dios, famia y patria,” el a agrega ripitiendo e lema di e ex-mandatario.

Dia 8 di februari ultimo Polis a inicia e operacion “Tempus Veritatis” contra Bolsonaro y varios di su aliado, incluyendo algun di su ex-ministernan caminda a haci entradanan hudicial, detencionnan y a prohibi na ex-mandatario pa sali for di e pais.

Segun e investigacion, e sospechosonan a plania desacredita e sistema di votacion electronico prome cu eleccion, y despues a prepara un golpi di Estado –cu no a tuma luga- contra e gobierno nobo di Lula.

Bolsonaro ta bisa cu e ta victima di un “persecucion” y diahuebs ultimo a usa su derecho di silencio durante interogacionnan di Polis.

Den encuestanan, Bolsonaro ta mantene su mes como lider di oposicion, aunke no por presenta na ningun eleccion, ora el a ser inhabilita te aña 2030 pa critica sin pruebanan e eleccion electronico.

Un di e abogadonan di Bolsonaro, Fabio Wajngarten, diahuebs ultimo a indica cu nan tabata spera entre 500.00 y 700.000 manifestante, asina como tambe un centenar di diputado.

E manifestacion tambe a haya promocion di e pastoor Silas Malafaia, un persona hopi influyente entre e miyones di evangelico na Brazil, votadonan clave pa Bolsonaro y e oposicion conservador.

For di dia cu el a laga e poder e ta yen di investigacionnan den su contra.

Den e manifestacion tambe tabatin banderanan Israeli cu riba rednan social a yama apoya Estado Hebreu despues di e declaracionnan polemico di Lula da Silva cu a compara e campaña militar na Gaza cu e Holocaust.