Gas propio ta ‘in’ y… Eagle LNG por ta ‘out’…?

Ministro encarga cu asunto di energia a caba di duna nos dos mensahe. Uno ta cu e grupo explorador Armstrong Oil & Gas Inc. lo a haci descubrimento di tres campo di gas natural den subsuelo di awa teritorial di Aruba, di cual un ta mustra di un tamaño sobresaliente. Segun e mandatario ta trata di un campo di tamaño den e categoria di e campo Perla, dilanti costa di Venezuela.

E campo Perla ta ser considera e hayzgo mas grandi di gas natural di e continente aki. Descubri na 2009 den parti west di peninsula di Paraguana, e reserva di Perla ta calcula na mas di 9 triyon pia cubico (235 biyon m3). Si e informaccion ta corecto, anto esaki por significa un beneficio hopi grandi pa economia di Aruba den e proximo decadanan. E otro anuncio tabata cu e situacion alrededor di e permisonan cu e compania Eagle LNG mester, no ta bay segun deseo. E ministro a keha di e burocracia cu no ta move cu diligencia, di manera cu ainda e compania no por cuminza operacion, tres aña despues di e MOU na 2021. Por lo tanto no tin vista ainda pa ki tempo lo tin gas natural na e planta di awa y coriente. Nos por imagina cu tin varios problema pa resolve, manera e trayecto cu e tuberia lo mester sigui, ya cu pasa riba tereno militar na Sabaneta lo no ta asina facil. Esaki por ta un obstaculo mayor? No tin nada conoci tocante e tema aki, pero si e ministro ta bisa cu tin obstaculo, anto esaki por ta uno.

Awor, kico esun anuncio tin di haci cu e otro? Nada, o esaki ta e anuncio cauteloso di un cambio di strategia, pasobra di tur manera Eagle LNG no ta avanza y posiblemente no ta continua, asina cu ta tira tur cos awor riba e produccion di gas dentro di e pais mes? Di tur manera lo mester warda riba demas accion exploratorio. E descubrimento lo tabata a base di estudio di e datonan sismologico disponible, entre otro di e compania Spaño Repsol cu algun aña pasa a haci perforacion den awa teritorial di Aruba, sin exito. Awor lo mester sigui cu perforacion nobo, pa comproba cu di berdad tin yacimento asina grandi den nos subsuelo. Despues lo mester busca compania cu e capacidad di inverti den explotacion di tal yacimento, loke ta costa tempo y placa. Entre descubrimento y produccion por tin facilmente entre 7 pa 10 aña.

Fuera di esey, si acaso Eagle LNG ta sigui, nan lo mester planifica ki tipo di capacidad lo establece na Aruba, tumando na cuenta e volumen di uso na Aruba, mas e parti cu posiblemente por bende cu exterior, por ehemplo a traves di bunkering na tereno di e refineria. Esaki no ta un tema simple, mirando e desaroyo cu gas natural den nos region a mustra den ultimo añanan. Competencia ta fuerte, ya cu varios pais den region conoce servicio di suministro di gas natural. Ademas, den e sector di turismo crucero mayoria di barco ta keda den arco norte di Caribe y no ta interesa den bunker asina leu di nan itinerario normal y ademas tin nan puerto di base, unda tambe tin gas.

Conclusion: entrega di gas natural na WEB por parce un tema cu no tin tanto di haci cu e eventual disponibilidad di gas natural di nos propio subsuelo, pasobra nan mester un solucion pa entrega di gas a corto plazo, no aki mas di 7 aña. Pero, si no ta bay tin actividad di Eagle LNG mas, anto lo mester warda casi un decada, desde awe, pa nos tin gas natural disponible. Esaki ta e mensahe cu nos mester/por comprende?

Tambe, si ta considera haci algo cu gas natural na Aruba, mester tuma na cuenta cu awendia explotacion di gas natural riba lama conoce caba transporte desde e plataforma riba lama directamente pa e mercado destina. No mester un puerto na e pais mes pa distribucion. Claro cu por pensa riba posible actividad economico na e isla mes, a base di gas natural, pero esey ta depende enteramente di e importancia cu un base riba un isla por tin pa un compania cu necesariamente lo ta produciendo pa exportacion. Esaki ta un tereno riba cual no tin ningun claridad ainda, y loke por bisa ta cu experiencia den ultimo decadanan ta hustamente cu no ta pone e tipo di industria aki mas riba un isla, cu ta aleha di e fuente y/o di e mercado cu tin na vista. No ta pornada cu e islanan di Caribe gradualmente a perde hopi di nan actividad agricola y industrial y a sigui nos tambe den e busqueda di nan futuro den turismo.

Di tur manera, e desaroyo aki a base di e hayazgo, si e resulta berdad y factible, ta brinda perspectiva grandi pa amplia nos base economico cu actualmente ta conta cu turismo so. Un hayazgo mayor di gas natural, o petroleo, ta algo hopi grandi en comparacion cu e tamaño di nos isla y nos economia. Entrada di royalties lo cambia totalmente e panorama pa nos debe publico y por pone nos ariba un ruta mas sostenible, si nos mandatarionan mustra madurez y sabiduria den uso di e recursonan extra aki. Asina aki, nos ta keda cu algun pregunta grandi: Eagle LNG ta bay o ta keda? E descubrimento ta resulta berdad? Y si esey ta asina, kico lo ta e maneho pa cu recurso natural y nos beneficio financiero? Pero, promer cu tur cos, ‘hay que ver’…

LJMADURO – 23-FEB-2024