Organisacion pa Cooperacion Economico y Desaroyo (OECD) ta evalua e sistema legal y financiero di tur pais y si e pais tin practicanan di “belasting paradijs” (paraisonan fiscal) nan ta pone e pais riba ‘Black List’ (Lista Preto). Dos biaha pa aña EU ta publica un resumen di e paraisonan fiscal.
Tin pais, entre otro Rusia y Panama, cu ta riba e lista preto y otro pais, manera Bahamas y Belice cu a wordo elimina di e lista aki diamars ultimo. Aruba tabata riba e ‘Grey List’ (Lista Shinishi) y esey por stroba inversionnan den nos pais.
Prome Minister Evelyn Wever-Croes a remarca den un comunicado di prensa cu Aruba na prome instante a haya e menasa cu nos lo wordo poni riba e Lista Preto. Sinembargo, nan a pone Aruba riba Lista Shinishi pasobra segun nan, Aruba no tabata cumpli cu e rekisito di ‘exchange of information’ (intercambio di datonan financiero).
Aruba diamars 20 di februari a ricibi e bon noticia cu EU a dicidi cu Aruba ta cumpli y a kita Aruba di e Lista Shinishi. Aruba ta oficialmente riba e lista blanco. Segun e comunicado, esaki ta un muestra mas cu e confiansa den Aruba ta creciendo. Corsou di otro banda, si ta wordo considera cu ainda tin tareanan pa haci por lo tanto ta keda riba Lista Shinishi.
“Nos ta hopi contento y alivia cu e decision aki. No tabata facil pa logra, pero sinceramente nada a bay facil desde cu nos a drenta den Gobierno. Esaki ta resultado di un vision ambicioso y un maneho responsabel. E logro aki ta danki na e esfuersonan y determinacion di henter e ekipo di DIMP y DWJZ y di Minister di Finansa Xiomara Maduro cu ta un dama di caracter pa haci loke ta necesario pa rescata reputacion financiero di nos pais”, Prome Minister Evelyn Wever-Croes a expresa.
