E Gasparilla Classic ta e torneo di gymnastics mas grandi di mundo den e ultimo añanan, cu un promedio di cinco mil hende homber y hende muhe gimnasta cu ta participa den e competencia aki. Aruba tambe ta wordo representa durante e magno evento, aki cu atletanan di e club Arubiano, Perla Gymnastics.
Gasparilla ta tuma luga na e stadion di e ekipo di baseball Tampa Bay Rays – Tropicana Field, na St. Petersburg, Florida. E competencia ta tuma luga riba e tereno di baseball bao di un dak cubri y e aña aki e lo tuma luga di 23 di februari pa 25 di februari.
Cu seis gym pa hende muhe y uno pa hende homber, atletanan ta biaha for di tur parti di Merca y tambe di mundo, incluyendo Bahamas, Canada, Cayman Islands, Colombia, Ecuador, Honduras, Jamaica, Puerto Rico, Trinidad y Tobago, y tambe Aruba, pa representa nan club y pais den e competencia internacional aki.
E club di Perla Gymnastics Aruba a sali rumbo pa Tampa Florida cu un total di 29 atleta cu lo ta competiendo den e diferente categoria- y nivelnan durante e tres dianan di competencia na Tampa, Florida.
