Recientemente den e medio di comunicacion internacional The Telegraph UK, Merca, a emiti un aviso di biahe na biaheronan tocante e seguridad pa bishita e islanan Jamaica y Bahamas, mirando e stadisticanan di crimen halto na ambos pais. Den e ranking aki Aruba a keda nombra como e destinacion di mas sigur den Caribe pa biaheronan.

Manera ya ta conoci, Merca ta emiti avisonan di biahe regularmente pa e biaheronan cu ta basa riba stadisticanan di crimen y e tipo di crimen cu ta sucede na cada pais. A base di e estadisticanan aki Aruba a sali den e posicion number uno como e isla di mas sigur den Caribe. Esaki ta debi na cu per capita Aruba su cifranan di criminalidad ta mas abao compara cu e demas islanan den Caribe.

Den e articulo titula “Is it safe to visit the Caribbean? Essential advice for Holidyamakers,” Merca ta emiti un advertencia di nivel 3 pa Jamaica debi na e cantidad di crimen violento cu bishitantenan ta experiencia. Pa loke ta trata Bahamas a emiti un advertencia di nivel 2, cual ta indica pa tene mas precaucion debi na e menasa cu tin pa posible delitonan violento.

Minister di Husticia y Asuntonan Social, Rocco Tjon, ken a publica tocante e noticia aki ariba rednan social, a menciona cu den un estudio conduci pa ATA, estadisticanan a demostra cu 98% di bishitante a indica cu un di e motibonan principal pa bishita Aruba ta pa motibo di seguridad.

A base di e cifranan aki, a instala recientemente e ekipo di Tourism Security Patrol Aruba, cual ta consisti di 15 persona cu a sigui varios training riguroso na diferente companianan di seguridad como tambe na Cuerpo Policial mes. Cada un ta ekipa cu material pa traha rapport, bodycam, flashlight, bicicleta electrico y mas, manteniendo orden publico den areanan turistico riba nos isla.

El a agrega cu banda di esaki, seguridad na frontera tambe a avansa y ta sigui avansa, danki na e radarnan cu a wordo instala, pero tambe na e strategisch grensoverleg, caminda diferente departamentonan hudicial ta trahando cu otro pa asina garantisa siguridad na nos frontera.

Por ultimo, el a menciona e proyecto di camara di seguridad como un adicion na e aporte pa loke ta trata seguridad na Aruba.