Recientemente, parlamentario independiente, Ryçond Santos do Nascimento, a trece dilanti su ponencia tocante patronahe politico na Aruba. Segun Santos do Nascimento, “MEP mester deal cu e hecho cu POR a genera tres investigacion penal.”
“Caso Diamante a resulta den condena, caso Flamingo den e confesion di Hans Geerman y ta pinta preto pa Otmar,” segun e parlamentario. “Solamente caso Kukwisa a termina den un sepot. Como cu MEP gusta grita “Dime con quién andas, y te diré quién eres” e amor entre POR y MEP mester ta doloroso awo. Ademas MEP mester deal cu e corupcion den su mesun seno, for di activistanan te na e integrantenan di mas importante. Vacuna-gate ta mustra cu despues cu Dangui a fix su campañadornan, nan a haci fiesta bendiendo prueba di vacuna den forma fraudulento. Caso Kwihi ta trata di comercio ilegal cu contract gubernamental, involucrando ex-ministernan Chris Romero y Eddie Briesen. Caso Tulipan ta trata di malversacion di placa, unda cu ex-polis y ex minister plenipotenciario Guillfred Besaril a biba na grandi, comiendo den restaurant caro riba custia di BBO.
“Como cu MEP no ta capaz pa sikiera evita corupcion den partido, e pretension di MEP pa crea un pais liber di corupcion ta ridiculo. MEP mes ta un riesgo di integridad. MEP su prome riesgo ta e ignorancia cu su parlamentario- y ministernan ta demostra. E prueba di nan ignorancia ta e frasenan cu nan ta usa pa papia di e problema: “integridad, nace bo ta nace cune”, “appel putri”, “esun cu faya mester sinta riba su blaar.” Ta comosifuera nan no a yega mas leu cu derde klas ora ta trata di integridad gubernamental y corupcion institucional. Nan no por reconoce un conflicto di interes y nan no sa nada encuanto un bon structura di governance. P’esey henter Aruba por mira cu nan ta incapaz di crea un cultura cu ta preveni corupcion den MEP mes. Ta simplemente imposibel pa kier elimina corupcion sin un maneho di riesgo. Loke ta crea corupcion structural no ta “appel putri”, sino e lodo putri di e patronahe politico di MEP y AVP. Ta hustamente e cultura corupto MEP no kier adresa y p’esey nunca MEP por ta efectivo.”
Despues, Santos do Nascimento a haci referencia na un comunicado di prensa di parlamentario di MEP, Ricky Hoek, kende a critica Santos do Nascimento pa yama MEP pa “cobarde pa combati corupcion.”
“Lamentablemente ora nunca bo a tuma accion pa combati corupcion, bo no por reconoce e pasonan pa combati corupcion tampoco. Ta un realidad cu MEP ta trahando proactivo pa caba cu corupcion. Y mi ta ripiti, e realidad ta cu MEP a bin cu tres diferente ley cu ta regarda integridad. Santos do Nascimento ta indica cu ley no ta nifica nada, si hende no ta tene su mes na dje. E pregunta ta e ora: Ki bo estudio ta bal y ta ki tipo di les a ser duna na su partido berde cu nan a vota contra di tur tres ley?” Hoek a skirbi. “Un diferencia grandi compara cu Gabinetenan Eman I y Eman II, unda cu Contraloria General (ARA) a adverti cu tin cosnan cu a cana hopi robes, pero no tin transparencia pa laga investiga e ex-ministernan Croes, Sevinger, Oduber, Visser, Dowers of Hooijboer-Winklaar. Di cual tur a conoce patronahe politico y añanan di bonanza riba custia di pueblo. Similaridad den casonan Tulipan, Kwihi, Anglo ta cu Gabinete Wever-Croes mes a entrega keho manera cu a tuma nota cu irregularidadnan a wordo señala. No tabata oposicion, ni señor Santos do Nascimento a entrega keho na autoridad, pero ta gobierno mes a percura pa instancia concerni haci nan trabao.”
Segun Santos do Nascimento, Hoek kier ataca su persona. “E ta spera di atacha mi credibilidad, pa e no mester deal cu e patronahe politico den MEP. Asina Ricky ta core pa e berdad. E ta yama mi e mastermind, esun cu a prepara e plannan corupto di AVP. Si berdad Ricky ta kere cu mi a conseha Benny pa skirbi “dezerzijds akkoord” of Paul con pa bende ontheffing of Michelle Winklaar pa fix contract lucrativo, Ricky berdad mester core, pero pa duna aangifte na Ministerio Publico,” e parlamentario a comenta. Ademas, a critica ex-prome minister di MEP, Nelson Oduber, acusando e di “tin un cachicachi extra den WEB” door di patronahe politico.
“Pa 30 aña Nelnan a usa parlamentario como marioneta, transformando Staten den un stempelparlement. Nan a uza aparato gubernamental como cabay di campaña y despues di 30 aña, mayoria di servicio di gobierno tabata pesimo. Djis puntra señora Evelyn Wever-Croes pakico Hulanda kier Landspakket. Ta un berguensa cu awe Nel ta pretende di por contribui algo na Setar of na WEB, mientras cu Nel mes a yuda sabotia sector semi-publico. Na aña 2020 a sali un rapport Corporate Governance in Aruba cu ta mustra cu bao Henny, Nel y Mike tabatin un free for all den sector semi-publico. Esey ta pasa ora hende ta campaña ‘Aruba ta Berde’, ‘Aruba ta Geel’, lubidando e color real di nos bandera.”
Santos do Nascimento ta conclui cu maske MEP no por combati e sistema di patornahe politico su so, si por cu ayudo di Hulanda. “P’esey MEP mester brasa RAft y acelera Landspakket, sin haci triki. Desmantela e sistema di nombramento politico den Setar, RDA, WEB, Elmar y Utilities etc. Traha hunto cu Hulanda pa crea proceduranan cu ta combati corupcion. Intensiva e relacion cu Hulanda riba control penal y handhaving. Of MEP ta prefera di bay tras di Paul, Benny cu Otmar cu ta grita tur dia cu Hulanda ta mal hende y Ministerio Publico ta inhusto? Para hunto cu Hulanda pa combati patronahe politico ta simplemente un cuestion di curashi.”
