Diaranson 15 di februari, Prome Minister Evelyn Wever-Croes a reuni cu Presidente di Corte di Husticia Sr. De Kort hunto cu e director nobo di Corte di Husticia Sr. Luttge. E Corte di Husticia ta pa Aruba, Corsou y Sint Maarten y a pesar cu e Presidente Sr. De Kort ta resorta na Corsou, ta importante pa Aruba ta den contacto cu su persona regularmente.
Sr. De Kort ta un Arubiano y ta ocupa e posicion importante di Presidente di Corte di Husticia y como tal, Gobierno di Aruba tambe tin bon linea di comunicacion. Sr. Luttge cu ta e director nobo, awe a acompaña Sr. De Kort durante e reunion pa asina cera conoci cu Prome Minister. Como director di Corte di Husticia, mescos cu e presidente, e tin di haci cu e Corte di Husticia di Aruba, Corsou y Sint Maarten.
Segun un comunicado di gobierno, e retonan grandi cu Corte di Husticia ta enfrenta ta retonan cu gobierno actual tambe ta enfrenta y ayera a delibera con por adapta y atende cu esakinan na e miho manera. Un tema hopi importante cu a bin dilanti ta trata e personal cualifica, y riba e tema aki Minister President a expresa su alegria ora el a haya elogio di e trabao di e griffiernan y e personal di corte di Aruba riba e hecho cu nan ta hopi bon prepara y ta eherce un bon trabao.
