(AP) — Dos menor di edad a keda acusa di crimen conecta na e tiramento masal na e rally di Super Bowl di Kansas City Chiefs, segun autoridadnan a bisa ayera, mientras e ciudad ta purba di recupera despues di e violencia.
Un comunicado di prensa di Corte Familiar di Jackson County a bisa cu a acusa e menornan diahuebs y cu nan ta deteni den e Centro di Detencion Hubenil “pa cargonan relaciona cu arma y resisti aresto.” E comunicado a bisa cu ta “anticipa cu cargonan adicional ta spera den futuro mientras e investigacion di Departamento di Polis di Kansas City ta continua.
No a duna mas informacion.
Polis inicialmente a detene tres hoben, pero a laga den libertad uno cu nan a determina no tabata involucra den e tiramento. Polis ta buscando otronan cu por tabata involucra y ta yamando pa testigo, victima y hende cu video di e incidente pa yama na un hotline dedica.
Un mama y DJ popular a fayece den e tiramento diaranson mientras e parada y rally tabata clausurando, y 22 otro – mas cu mita di nan mucha – a resulta herida. Pa diabierna, dos hende tabata den condicion critico y uno tabata den condicion serio. Mayoria di mucha herida a sali di hospital y ta spera cu nan lo recupera.
E Chiefs a gana nan di tres Super Bowl den cinco aña diadomingo, derotando e San Francisco 49ers 25-22 den overtime. E dos celebracion anterior a tuma lugar sin problema.
Diaranson, e hungadornan a core riba busnan cora door di e ciudad mas grandi di Missouri. E parada a caba cu un rally na Union Station. E tabata cabando ora cu a scucha tiro, y mayoria hende a kere cu tabata klapchi.
E tiramento a tuma lugar a pesar di presencia di mas di 800 agente di polis den e area, incluyendo riba structuranan cercano, segun alcalde Quinton Lucas, kende a atende e rally cu su esposa y mama y a core busca seguridad ora a scucha e tiro. Pero e no ta spera di cancela e parada di St. Patrick’s Day proximo.
