Desde cu Radio Kelkboom, e prome emisora comercial na Aruba, a transmiti su señal na 20 di maart 1954, e asignacion di frecuencianan di radio nunca a ser regula den beleid y esei segun Minister Geoffrey Wever ta algo indeseabel.
Mester tin transparencia y regla stipula cu ta aplica na tur persona ora di otorga permisonan pa frecuencia di radio. Pa es motibo aki a haci un destaho pa busca un compania cu experencia riba e tereno aki pa prepara e beleid nobo pa asinan formalisa e proceso di asignacion di frecuencianan pa radio.
E proyecto ta cuminsa cu un fase di evaluacion di e mercado actual, cual lo ser realisa pa profesionalnan Hulandes cu tin experiencia riba e tereno aki. E obhetivo aki ta pa defini e alcanse y condicionnan di e mercado, y cu esaki como fundeshi, hunto cu Directie Telecommumicatie Zaken desaroya e beleid nobo. E beleid aki lo mester elimina e posibilidad di trato discriminatorio of inhusto den asignacion di frecuencia di radio den futuro.
“Regulacion di e proceso pa solicitacion di frecuencia ta un paso importante pa nos garantisa un mercado mas transparente y husto,” Minister Geoffrey Wever ta declara. E proceso aki ta spera pa dura aproximadamente shete pa dies (7-10) luna, incluyendo e analisis di mercado, pa despues por finalisa e beleid nobo.
Minister Geoffrey Wever ta comprometi pa mantene e comunidad informa riba e avansenan di e iniciativa aki den e lunanan binidero.
