Ayera riba rednan social tabata circula e noticia cu a haya un curpa sin bida di un adicto ambulante den centro di Oranjestad. Team di Bon Dia Aruba a acerca vocero di Cuerpo Policial di Aruba (KPA), Liliana Rasmijn, pa asina haya algun informacion adicional ariba e caso aki.
Rasmijn a informa cu pa mas o menos 1:35 di atardi, Cuerpo Policial a ricibi un yamada di telefon na central di polis cu a informa ariba e sucedido aki.
Cuerpo Policial a despacha patruya y e personal necesario pa atende cu e caso aki.
El a indica cu causa di morto a ser determina como causa natural y pa causa natural no ta necesario pa haci investigacion.
Slachtofferhulp tambe tabata presente na e sitio pa asina duna asistencia.
E situacion di adicto ambulante ta uno cu lamentablemente ta keda un problema, y uno cu ta sigui crece, na Aruba. A pesar di e diferente esfuersonan di tanto Gobierno di Aruba como fundacionnan no lucrativo dedica na brinda ayudo na e personanan aki, e problema ta persisti.
Den ultimo tempo tambe, y un hecho hopi lamentable, e problema aki ta apareciendo cada biaha mas entre hobennan cu ta cay den adiccion na edadnan jong.
Na varios ocasion Minister di Husticia y Asuntonan Social, Rocco Tjon a toca e tema aki y den nan esfuerso pa purba yuda alivia e situacion, ta inverti den proyectonan pa brinda ayudo y servicio na e adictonan aki, y tambe nan famianan.
