Diamars, Minister di Husticia y Asuntonan Social sr. Rocco Tjon a bishita Cuerpo Policial di Aruba na Macuarima, caminda a hiba un dialogo cu Korps Management Team (KMT). A ricibi un presentacion pa loke ta e evaluacion di carnaval, manera ta conoci Cuerpo Policial a haci un tremendo trabou e luna tras di lomba y e weekend cu a pasa, caminda a logra mira cu orden publico a wordo garantisa pa ambos participantenan y mirones.
Durante e reunion aki, a wak y recapitula tur e pasonan cu ya caba a wordo tuma pa loke ta inversionnan pa cu Cuerpo Policial. Asina a toca e timeline pa loke ta uniform nobonan cu ta muy pronto lo ta yegando Aruba, pero tambe e portofoons y e autonan nobo cu ta na caminda. Banda di esaki a wak e desaroyo di e diferente inversionnan infrastructural, segun planificacion, e trabounan pa loke ta e warda di Polis di Savaneta lo inicia otro siman. E Operation Command Center, e trabou aki lo wordo entrega na april y e Family Justice Center lo keda cla na juni.
Na mes momento a wak tambe e inversionnan cu lo bay wordo haci pa aña 2025 pa loke ta e partinan infrastructural, tecnologico y innovativo y mas. Ademas di esaki, a ricibi feedback tambe tocante e reorganisacion cu ta den pleno ehecucion. Un reorganisacion cu ta bay haci e organisacion di Cuerpo Policial di Aruba, uno mucho mas dinamico y asina brinda mas perspectiva pa tur e coleganan cu ta forma parti di Cuerpo Policial di Aruba.
Un reunion sumamente positivo, den bon ambiente, caminda a scucha feedback y a comparti ideanan y dialogo cu Alto Mando di Polis. Un pabien grandi y un danki na henter Cuerpo Policial pa e bon trabou cu nan a haci durante e temporada tras di lomba.
