Recientemente mediante un comunicado di prensa, Minister di Turismo y Salud Publico, Dangui Oduber, a informa cu el a reuni cu Director di Aruba Ports Authority (APA), Marc Figaroa, CEO di Aruba Tourism Authority (ATA), Ronella Croes y tambe e representante di DOW y Monumenten Bureau Aruba, Raul Gei, pa un reunion tocante e proyecto di ex-DOW cu lo inicia pronto.

E edificio di ex-DOW tin 16 aña bandona caba y ta crea un bista no mucho bunita pa e turistanan cu ta bishita e isla, specialmente turistanan crucero. Cu e proyecto nobo aki lo renoba e edificio completamente.

E proyecto nobo aki pa e ex-edificio di DOW ta encera cu e oficinanan existente di APA lo mester muda bay den e edificio aki.

E edificio ta bay wordo comparti y oficinanan di APA ta bay wordo ubica na e di dos piso di e edificio. ATA ta e organisacion cu ta bay huur piso uno di e edificio y lo bay converti e piso aki den un Visitor Information Center pa brinda informacion na e turistanan.

E meta di e Visitor Information Center ta pa brinda tur informacion di kico tur e turistanan por haci na Aruba, cual ta tur e actividadnan, e miho beachnan pa bishita, un lista di e miho restaurantnan y kico Aruba en general tin pa ofrece, bida nocturno, transporte, entre otro.

Desde maart aña pasa, Gobierno di Aruba a anuncia cu APA lo muda pa e ex-edificio di DOW, den cuadro di e proyecto Aruba Port Authority.

Prensa local di Aruba a wordo invita e tempo ey pa haci un recorido den e edificio aki pa asina por mira den ki estado e edificio aki ta na e momentonan aki desde cu DOW a muda na su edificio nobo 16 aña pasa.

Durante un conferencia di prensa, el a informa cu debi na cu e edificio a keda bashi el a bay hopi atras y den cuadro di e proyecto di Aruba Port City cu gobierno a anuncia hunto cu Aruba Ports Authority (APA), Minister Oduber a indica cu nan tabatin un pensamento, teniendo na cuenta caminda edificio actual di APA ta situa y cu ta forma parti di e proyecto aki, na dado momento APA lo mester a busca un edificio nobo sea construyendo un nobo of huur un cu ta existi caba. Asina a yega na e idea pa muda APA den e ex-edificio di DOW.

El a splica cu tabatin combersacionnan entre gobierno, APA y Monumentenbureau pa

wak kico tabata e posibilidadnan pa APA por tuma e edificio aki, pa por muda y haci di esaki su oficina principal.

E partinan a tene na cuenta tambe cu APA no tin hopi empleado pa por drenta den edificio aki su so, cual ta hopi amplio y door di esey nan a acerca ATA pa puntra si nan tabatin interes di huur e otro parti di e edificio aki cu ta e parti di abou y transform’e den e Visitor Information Center.

Igualmente nan a explora diferente escenario cu e edificio aki ta brinda y nan a prepara

un draft di un Memorandum of Understanding (MoU) entre Gobierno di Aruba, Aruba Ports Authority, Aruba Tourism Autorithy y Monumentenbureau pa delinea kico exactamente nan ta desea di bay explora pa haci di e proyecto aki un realidad.

Minister Oduber a splica cu e intencionnan aki a wordo presenta na Conseho di Minister cual a aproba esaki e proyecto pa APA por tuma over e ex-edificio di DOW. Nan a publica esaki tambe den landscourant pa asina por motiva, argumenta y splica pakico gobierno a opta pa bay negosha cu APA pa nan por tuma e edificio aki.

“E ta un edificio bunita, e ta monumental y nos deseo ta pa conserva esaki, ta e prome

impresion cu turistanan crucero ta haya ora di yega Aruba y nos no kier pa edificio aki keda bay

atras,” el a sigura.

E mandatario a expresa cu dentro di poco nan ta bay firma un MoU oficial entre e

instancianan concerni den caso aki pa oficialmente cuminsa explora e posibilidadnan y

tambe duna APA e espacio pa por busca financiamento pa cuminsa e proyecto aki.

“Nos ta convenci cu nos lo por cuminsa e proyecto e aña aki ainda, esey ta e intencion, pa nos por firma MoU y despues bay over ora APA keda cla cu financiamento, pa asina pone e prome

piedra y otro aña nos por tin un bunita proyecto conservando un monumento cu ta asina importante den area aki despues di 14 aña,” el a bisa durante e conferencia di prensa e tempo ey.

Ronella Croes, CEO di ATA, a expresa cu nan tabatin e mira riba edificio aki for di varios aña

caba na unda ATA a traha y a analisa un posibel mudamento di nan oficina pa e edificio aki.

“E tempo ey tabatin diferente motibo di pakico nos a scoge e edificio, e lo a permiti nos contribui cu e restauracion di un monumento na Aruba y nos a tene cuenta cu e hecho cu ta asina centralmente ubica permitiendo nos tambe pa facilita y duna miho servicio na nos bishitantenan

pero tambe lo a cuadra cu nos ekipo cu nos tabatin na e momentonan ey, no a concretisa esaki, pero e deseonan pa ta envolvi y e motibonan si a keda vigente,” Croes a comenta.

Esaki lo permiti pa brinda na e bishitante di turismo crucero y turismo en general no solamente servicio personal, sino tambe haciendo uso di tecnologia. E aña aki nan punto di enfoke lo ta como tal pa traha riba e diseño di e Visitor Information Center pa ora edificio lo ta cla cuminsa cu e acuerdo cu APA pa huur e parti cu nan tin mester.

Di su parti, Mark Figaroa director di APA a señala cu esaki ta un oportunidad cu nan a evalua manera e otro instancianan pa asina wak e miho opcionnan cu por tin pa nan logra esaki.

“P’esey awe nos ta para akinan seguramente pa wak e potencial cu e edificio aki tin y seguramente cu ta bay mehora e producto di turismo, pa nos specialmente e parti crucero cu ta

sumamente importante,” el a bisa.