(AP) – Mas di mil migrante for di paisnan Sub-Sahara a yega Spaña su Islanan Canario den 18 boto durante e ultimo 3 dia, Spaña su servicio di rescate marino a informa dialuna. Un curpa a ser haya riba un di e botonan.
E archipielago noord-west di Africa a mira un aumento den yegadanan di migrante den simannan recien mientras mas persona for di West Africa ta cuminsa e biahe peligroso. Oficialnan ta bisa cu 7,270 migrante a yega den januari, mas o menos e mesun cantidad cu loke a mira den e prome 6 luna di 2023. Mayoria di e boto ta sali for di Mauritania. Prome Minister Pedro Sanchez y President di Comision Europeo Ursula von der Leyen lo bishita e pais riba diahuebs pa encurasha e autoridadnan purba combati y evita e salidanan.
Spana y e Union Europeo tin acuerdonan di cooperacion cu ambos Mauritania y Senegal pa purba reduci e cantidad di migrante cu ta yegando e isla riba boto. Sinembargo algun di e hobennan ta insisti pa core e riesgo y ta bisa cu tin demasiado tiki oportunidad y problemanan politico den nan pais. Spana su ministerio interior a bisa cu un record di 55,618 migrante a yega via boto, mayoria di nan den e Islanan Canario, aña pasa, cual ta mas cu dobel e cantidad cu a mira den e aña anterior.
E organisacion Caminando Fronteras ta bisa cu mas di 6,600 migrante a fayece purbando di yega Spaña via boto aña pasa, mayoria di nan via e ruta Atlantico. E figura ta mas cu dobel di e cantidad cu e organisacion a reporta den aña 2022.
Caminando Fronteras ta bisa cu nan ta colecta nan figuranan for di famianan mes di e migrantenan ademas di estadisticanan reporta pa e organisacionnan y servicionan di rescate.
