(DW) – E fayecidonan den varios candela forestal registra na region di Valparaiso, ubica na 100 kilometer di Santiago, a subi te 51, segun fuentenan oficial a informa den ultimo oranan di diasabra.

Servicio medico legal a registra prome 45 morto, “pero tin seis persona mas cu a fayece den centronan asistencial,” sub-secretario di Interior, Manuel Monsalve a informa.

“Nos sa cu e victimanan ta bay aumenta,” e mandatario Chileno Gabriel Boric a bisa den un cadena nacional for di Palacio La Moneda unda por a mira cu e tabata afecta pa e situacion aki.

Un ultimo rapport di e minister di Interior, Carolina Toha, a reitera cu e number di mortonan “por ta hopi mas halto” cu e transcurso di e oranan. “Ainda nos tin un parti grandi di un teritorio cu no ta accesibel, como consecuencia nos no tin un number completo di victimanan.”

Boric a pidi na habitantenan di e areanan afecta pa atende e alertanan cu ta yega na telefon celular “nos mester ayudo di tur. Debi na yamada di evacuacion tin cu reacciona di biaha pasobra e candela ta expande hopi lihe: si e mensahe ta yega na boso ta pasobra mester evacua. Tur decision ta ser tuma pa expertonan den e materia.”

Ta trata di e candelanan mas mortifero den ultimo tempo na Chile y casi ta duplica e balans di candelanan di aña pasa, cu a kibra un record di fayecido cu 27 morto.

Te ayera diadomingo, tabatin cuatro candela grandi activo na region di Valparaiso: dos na ciudad costero di Viña del Mar y otro dos na Quilpe y Quillota.

E candelanan devastador origina diabierna na e seronan cu ta rondia e ciudad di Viña del Mar ta sigui avansa y a alcansa sectornan industrial, na unda a registra varios explosion di almacen di kimico, fabricanan di pintura y otronan.

E explosion a genera un huma toxico preto na e denomina “ciudad hardin,” un di e puntonan mas turistico di Chile, cu cada zomer ta atrae miles di bishitante.

Pa facilita e labornan di rescate, pa paga e candelanan y mantene habri e vianan di evacuacion, Gobierno Chileno a ordena un toque de queda di 12 ora, for di 9or di anochi na sectornan cu te ainda no a ser evacua na localidad di Quilpue, Villa Alemana, Limache y Viña del Mar.

“Nos prioridad ta pa salba bida y pa esey nos mester dispone di tur red di salud publico y priva,” Boric a sigura y a reconoce cu tin sospecho cu e candelanan por a ser provoca.

“Pa boso sa cu ta bay investiga te ultimo consecuencianan y cu tur recurso necesario.” El a bisa.

Aunke Chile a biba un di e winter cu mas yobidanan den ultimo 15 aña, specialistanan tin lunanan alertando cu secura no a caba ainda y cu ta existi un probabilidad grandi cu lo desaroya vegetacion fini y morto den e zona cu ta bira un vegetacion facil di coy candela.