For di diahuebs ultimo tabatin rumornan den comunidad den cual tabata sigura cu stacionnan di gasolin na Aruba a dicidi di stop e benta di e servicio di coriente prepaid di ELMAR na unda cu ayera e informacion a ser confirma y ELMAR a manda un comunicado informado tocante e ampliacion di nan orario di servicio na nan sucursal.

Ayera stacionnan di gasolin na Aruba a dicidi di no bende mas “SmartUp Prepaid service” pa motibo cu tin cierto mal contento for di algun tempo caba door di stacionnan di gasolin pa loke ta trata nan gastonan.

Ademas tambe por a compronde for di un fuente cu stacionnan di gasolin tin exclusividad pa bende coriente prepaid pa ELMAR, loke a causa un otro mal contento debi na anuncio di ELMAR unda nan a informa riba un metodo nobo di pago na un forma digital pa e servicio di coriente prepaid (SmartUp) via e aplicacion di Pay.Aw.

Bon Dia Aruba a tuma contacto cu Aruba Gas Dealers Association (AGDA) pa asina haya un reaccion di e presidente pero te ciere di edicion aki, redactor no a haya ni un contesta.

Di otro banda, ayera ELMAR mediante un comunicado di prensa a informa cu diahuebs 1 di februari 2024, a introduci un opcion di pago adicional via e app di Pay.Aw di SETAR, cual tin como meta pa brinda mas conveniencia na e clientenan cu ta prefera transaccion online.

E lansamento di pago via Pay.Aw tabata un introduccion di forma extra di pago, na banda di e dos formanan di pago existente cual ta na sucursal di ELMAR y na stacionnan di gasolin rond di Aruba, “e introduccion aki no tabata tin como intencion pa reemplasa e otro formanan di pago existente,” nan a sigura.

“Sinembargo, ELMAR a haya informacion ayera mainta, diabierna 2 di februari, for di nan clientenan cu ta prefera un transaccion personal, cu tin stacionnan di gasolin cu a stop e servicio pa recarga nan cuenta di SmartUp Prepaid, Aruba Gas Dealers Association (“AGDA”) a tuma e decision pa suspende e servicio aki sin notificacion previo na ELMAR of nan clientenan.” Nan a declara.

Igualmente, nan a bisa cu actualmente nan ta trahando activamente pa busca un solucion pa nan clientenan di SmartUp Prepaid y pa facilita na e clientenan nan sucursal di Oranjestad lo ta habri:

  • diasabra 3 di februari 2024, for di 8:00am te cu 4:00pm
  • Diadomingo, 4 di februari 2024, for di 8:00am te cu 4:00pm.

Entrante dialuna 5 di februari 2024, tanto nos sucursal di Oranjestad como esun di San Nicolas lo ta habri for di 7:45am te cu 8:00pm.

Alabes Contact Center tambe lo ta habri e mesun orarionan cu nan sucursal di Oranjestad. Mientrastanto, nan kier encurasha nan clientenan di SmartUp Prepaid y EV ChargeUp pa explora e opcion di pago digital disponibel via e app di Pay.Aw.

Pa finalisa, nan ta enfatisa cu “Nos ta urgi nos clientenan di SmartUp Prepaid cu ainda ta dispone di un meter STS (manual of cu keypad), pa haci uzo di e oportunidad aki pa recarga coriente na un di nos sucursalnan. E forma di pago via Pay.Aw no por wordo utilisa pa e meternan aki. Nos clientenan di SmartUp Prepaid por keda trankil cu si ricibi notificacion durante anochi cu e cantidad di kWh ta cabando, e meter Prepaid lo continua suministra coriente te cu 8:00am, dunando asina e oportunidad pa pasa recarga su siguiente mainta na sucursal di ELMAR. Esaki ta conta solamente pa clientenan Prepaid cu smart meter. Nos kier urgi clientenan Prepaid cu meter STS (manual of keypad) pa recarga durante orarionan nobo di servicio.”

Mientras tanto, riba rednan social e reaccionnan no a tarda, caminda usuarionan tabata indica cu den “temponan aki tur cos a bira online, pero mester compronde cu no tur hende sa of no por haci uso di servicio online.”

Otro usuario preocupa tabata “unda por haya carchi den fin di siman,” pa loke ELMAR a sigura cu por usa e opcion di pago online PAY.AW.

Otro usuario tabata indica cu “ami kier e opcion di paga cash, cu niun intencion di warda 1 ora den ELMAR, mientras cu na stacionnan di gasolin no tabata ni 5 minuut. Mi no sa kico boso lo tover, pero e opcion di paga cash mester keda habri y accesibel na tur districto, y no na ELMAR of MFA cu ta dura mas tempo den rij, haci’e hende su bida mas facil.”

Igualmente, por a compronde cu dialuna awor ambos banda tanto ELMAR como AGDA lo sinta cu otro pa por trece un solucion na e decision aki mirando e cantidad y e reaccion di usuarionan, stacionnan di gasolin tin varios punto riba mesa como por ehemplo, cu nan no por sigui carga e gastonan, costo di bida a aumenta y ELMAR no tabata dunando mas placa pa e servicio “exclusivo” aki segun e fuente a sigura.