(DiarioLibre) – Matthew Miller, vocero di e Departamento di Estado di Merca, a bisa diahuebs cu Merca ta mantene e speransa cu Kenia lo lidera e forsa multinacional na Haiti cu cual ta busca reduci e nivelnan di violencia cu e pais Caribense ta enfrenta.
E vocero no a contesta si su pais a contempla otro opcionnan of strategianan pa forma otro ekipo di ayudo pa Haiti den caso cu Kenia no por haci esaki.
“Obviamente, nos a wak e decision di e Corte Supremo di Kenia siman pasa. Nos a tuma nota cu e poder ehecutivo di Kenia a declara cu nan ta bay apela e veredicto ey. Nos ta pendiente na e asunto aki.”
Miller a combersa ariba e tema den un rueda di prensa despues di e reunion cu e Secretario di Estado, Antony Blinken y e Minister di Relacion Exterior di Kenia, Musalia Mudavadi, den cual ningun di dos a ofrece un declaracion ariba e futuro di e mision aki cu mester cuminsa den e prome trimester di e aña aki.
“Nos ta sigui traha cu e asociadonan internacional, tanto cu Kenia como cu otro asociadonan internacional, ariba loke ta trata e finaciamento di e forsa policial multinacional aki y nos kier pa e cuminsa cana lo mas pronto posibel,” Miller a finalisa.
Memey di luna di januari, un tribunal di Kenia a blokia e plan “inconstitucional, ilegal y invalido” di e gobierno di desplega mil agente di polis pa Haiti den e marco di un mision respalda pa ONU.
E veredicto aki ta nifica un stop na e forsa multinacional aki, cu ta wordo spera cu hopi ansiedad na Puerto Principe, cu a wordo pensa pa combati e caos creciente na e pais Caribense. Eynan e violencia di e bandanan a causa cerca di cinco mil morto den 2023, di cual mas di 2.700 tabata civilnan, segun e ultimo rapport di Nacionnan Uni.
Dianan despues di e respuesta di e tribunal di Kenia, e presidente di Kenia, William Ruto, a informa cu Kenia ta bay sigui pa dilanti cu su plannan di lidera e mision di seguridad aproba pa e Conseho di Seguridad di ONU na Haiti, esaki a pesar cu e tribunal na su pais a blokia e despliegue.
