Ayera huez-comisario a duna ordo pa alarga detencion preventivo di e sospechosonan E.M.G.K. y M.S.M den e investigacion Kwihi. Na mes momento huez-comisario a dicidi tambe cu e detencion preventivo lo no wordo ehecuta semper y cuando e sospechosonan tene nan mes na condicionnan.

Un di e condicionnan aki ta cu e sospechosonan mester meld nan mes na momento cu nan wordo yama pa interogacion.

E investigacion Kwihi ta continua. No ta descarta detencionnan nobo.

Kwihi ta un investigacion tocante acuerdonan di servicionan (dienstverleningsovereenkomsten) den e periodo 2017-2021, cera door di e minister anterior di Transporte, Comunicacion y Sector Primario cu varios persona huridico (rechtspersonen).

Investigacion den e caso denomina como ‘Kwihi’ a cuminsa cu entradanan hudicial bao guia di hues-comisario, cu a tuma luga na varios adres relaciona cu e investigacion di algun contract di servicio cera door di ex-minister Chris Romero, tempo cu e tabata den su funcion como minister.

E zoekingnan a tuma luga na cuatro adres unda a bay cu administracion di compania, computer y varios hard disk cu ta elementonan crucial pa e investigacion di Landsrecherche.

Tabata dia 21 di november ultimo cu OM a informa di detencion di E.M.G.K., un persona considera amigo, man drechi y ex-coordinador di ex-minister di Transporte, Comunicacion y Sector Primario, Chris Romero. Sinembargo, e tempo aya Ministerio Publico a indica cu a laga K. den libertad “pa motibo di circunstancianan personal.” Sinembargo, e tempo ey caba a indica cu K. tabata keda como sospechoso den e caso.

For di comienso, e sospechosonan principal den e caso Kwihi ta ex-minister Romero, su ex-coordinador K. y e muhe identifica como M.S.M. M. ta aparece riba e pagina di Camara di Comercio di Aruba como propietario di e compania MADBOR CONSULTANCY. E compania aki a fungi manera un uitzendbureau pa e ex-mandatario y ta sospecha cu a ricibi placa fraudulentamente di Pais Aruba via e construccion aki.

Tambe Ministerio Publico ta investigando si e placa cu e personanan aki – Koolman cu Maduro – a usa pa cumpra un corant digital cu ta riba mercado di Aruba, ta bin for di actonan castigabel. Si esaki ta e caso, e lo por cambia completamente e panorama di e investigacion.

Tambe por a compronde cu Landsrecherche a yama e otro socio di e corant digital pa e por duna su declaracion den calidad di testigo den e caso specifico aki. Te na e momento aki, resultado di e linea aki di investigacion no ta conoci.