(AP) — Un corte federal a emiti un mandato temporal contra coridanan di toro na Ciudad de Mexico ayera, mientras activista y sostenedornan di e practica un biaha mas a enfrenta otro den corte.
Pelea di toro apenas a bolbe diadomingo na Plaza Mexico den e capital, cu a tene e prome pelea di toro legal na e ciudad den casi dos aña.
E veredicto aparentemente ta bay forsa pa pospone peleanan programa pa dianan 4-6 di februari; e organisadonan ainda no a anuncia kico nan ta bay haci.
Na mei 2022, un corte local a duna orden pa stop coridanan di toro, bisando den su veredicto cu e practica ta viola e derecho di e residentenan pa un ambiente saludable liber di violencia.
E caso aki a keda apela den Corte Supremo, cu a retira e prohibicion pa motibonan en gran parti tecnico, pero cu a laga e preguntanan base sin resolve.
Pero e alegria di entusiastanan di pelea di toro a dura apenas algun dia. Sostenedornan di derechonan animal rapidamente a entrega otro reto legal cu a resulta den e veredicto di ayera, cu ta suspende e peleanan te dia 7 di februari. Na e punto aki, ta bay tene otro audiencia pa considera e keho di e activistanan cu e practicanan ta somete e animalnan na crueldad, y ta viola derechonan humano pa ta liber di espectaculonan di crueldad degradante y insensibilidad ambiental.
Gruponan di derechonan animal ta logrando avancenan na Mexico den añanan recien, mientras siguidonan di corida di toro a sufri varios obstaculo. Na algun estado manera Sinaloa, Guerrero, Coahuila, Quintana Roo y e ciudad occidental di Guadalajara, medidanan hudicial awo ta limita e actividad.
Ranchero, comerciante y fanaticonan ta insisti cu e prohibicion riba corida di toro ta viola nan derecho y ta pone den riesgo varios miles di trabao vincula cu e actividad, cu nan ta bisa ta genera como $400 miyon pa aña na Mexico.
Asociacion Nacional di Criadornan di Toro di Pelea na Mexico ta calcula cu pelea di toro ta responsable pa 80mil trabao directo y 146mil trabao indirecto. E asociacion a tene evento y tayer den añanan recien pa promove pelea di toro y atrae fanaticonan nobo y hoben.
