Cualkier debate tocante rumbo di gobernacion lo keda domina pa e debenan cu nos lo mester elimina pa gran parti. Den esey ta surgi idea con pa reduci esaki, manera e idea proponi pa lider di e partido democrata cristian pa pidi gobierno Hulandes converti e debe di mas di 900 miyon florin den un fondo di inversion. Esey ta zona masha bunita, di un momento pa otro nos no tin debe sino un suma fantastico pa inverti den futuro di nos pais, ki mas bo kier? Partido di coalicion a bay di acuerdo cu e propuesta opositor pero e partner mayoritario den gobierno ta parce di tin otro pensamento, cu por tin di haci cu e realismo di e propuesta aki. Riba su mes hopi hende lo aplaudi un idea asina, pasobra e lo significa un cambio radical den perspectiva di proximo añanan. Tambe mester tuma na cuenta cu banda di e pagonan riba interes y suma capital gobierno no tin tanto posibilidad pa inverti, sin e posibilidad aki.
Pakico anto lo mester tuma e plan pa e fondo di inversion aki como algo irealistico? Pa haya sa esey nos mester mira e asunto di otro banda. Ora propone algo asina, e ta trata di placa di otro hende, no di nos. Imagina bo ta bay banco y propone nan cu e debe cu bo tin riba bo auto keda poni na bo disposicion pa bo, por ehemplo, instala un sistema di panel solar riba dak di cas. Nan lo bisa bo: “Si nos comprende bon, nos no ta haya nos placa back, ni interes, anto riba esey nos ta duna bo otro regalo pa bo panel solar; ta banco nos ta, no Sinterklaas…”
Awor, nos por comprende cu lo presenta e caso concreto aki di otro manera. Parcialmente esey ta corecto den e sentido cu ta existi un relacion di apoyo y ayudo entre Hulanda y Aruba. Hunto cu e ayudo den forma di prestamo den tempo di crisis ta existi un programa di asistencia pa logra e reformanan necesario pa Aruba por progresa cu vista pa futuro, especialmente den sentido di reforza operacion gubernamental den varios aspecto. E ayudo aki, bao capa di e Landspakket ta den ehecucion caba y ta encera ayudo Hulandes unda a yega na acuerdo cu esaki ta necesario. Talvez no ta mira esaki como ayudo financiero concreto, pero durante e añanan cu e asistencia ta core esaki ta implica gasto pa Hulanda, aunke no cuantifica concretamente. Esey ta haci cu na e momento aki Aruba ta pagando un debe y di otro banda ta haya ayudo. Si ta bisa Hulanda awor pa lubida e debe y aumenta e ayudo drasticamente, e promer pregunta lo ta, a base di kico Aruba merece e regalo aki? Hustamente gobierno di Aruba y di Hulanda ta na mesa pa purba termina e negociacion tocante e supervision financiero, cu a pesar di palabra bunita, e actual gabinete no ta desea. Trece e propuesta di e apreciable rival politico den e negociacion ta parce ‘djis un tiki di mas’… Muy probablemente e contesta Hulandes lo ta: Kico nos debe boso despues di tur e berinche contra un ley di Reino? Awor un fondo di inversion envez di paga bo debe, y si nos no ta hera bo ta sigui bo oposicion contra e ley tambe? Naturalmente e promer asunto cu gobierno di Aruba lo mester contesta den un tal situacion ta unda nan ta para cu nan continuo protesta contra e ley di Reino, y ta logico cu ni e secretario di estado demisionario, ni un eventual gobierno Hulandes nobo, ta bay discuti cualkier profundizacion di e relacion di ayudo, sin un claridad encuanto aprobacion di banda di Aruba di e ley, algo cu na e momento aki no ta conveni gobierno di Aruba di ningun manera. Concretamente e ta kita nan posibilidad pa keda core pa e decision ey, loke na e momento aki ta parce e maneho actual di keda ‘delay, delay, delay’. Ademas, no mester lubida aki cu no mucho tempo pasa di igual manera no a logra papia tocante converti parti di e debe den un donacion. E contesta Hulandes ta conoci.
Pero esey no ta tur. Pregunta: Con Hulanda ta evalua e colaboracion den cuadro di ehecucion di e Landspakket? Nos tin casi cuatro aña den e asunto aki y e frutonan di e esfuerzo conhunto no ta di gaba. Esey tin su splicacion, pero ta uno cu nos no por spera, ni di ambtenaar ni politico Hulandes bisa publicamente; esey ta nos mes mester haci. Hopi di e reformanan proponi lo haci daño na e sistema di patronahe y di compadrazgo cu podernan economico local, especialmente amigo y famia. Mas eficaz y mas transparente gobernacion di Aruba logra bira bao presion Hulandes, mas esaki ta afecta e sistema di patronahe politico manera el a funciona te awor. E dos partidonan cu mas tin di perde den un eventual ‘exito’ di reforma gubernamental ta hustamente e dos partidonan cu desde 1986 a dicta rumbo y resultado di gobernacion di Aruba. Claro cu publicamente ta necesario pa declara cu nan ta di acuerdo cu tur principio di bon gobernacion, pero mantene un berdadero intencion di cumpli cu esaki, esey ta otro cuento. Hulanda no ta bay bisa esey tampoco publicamente, pero habri posibilidad amplio di financiamento sin sa kico Aruba ta bay haci cu e placa, no ta parce un posibilidad realistico. Por ultimo, Aruba no por a ni cumpli cu e poco inversion cu tabata presupuesta den ultimo añanan; te pa por maneha inversion mas grandi anto…?
