Preparacionnan pa participa den Carnaval a cuminsa aña pasa, pero door di diferente factor cu a bin dilanti na e tempo ey, nan a dicidi di prepara miho un tiki mas y bin cu mas forsa pa drenta den e vibe di Aruba su Carnaval 70 cu ta den full swing.
Arnold Malmberg, ken ta Prins Infantil y Jayven Jansen, Pancho Infantil di Aruba su Carnaval 70 a representa e grupo Don Flip Carnival Group e biaha aki denomina “Prins Caya Pidi y Pancho Caya Haya.”
Baila tur cantica cu nan ta scucha y participa den carnaval ta loke mas nan ta gusta segun e mama di Arnold, Tamara Malberg a comenta na redactor di Bon Dia Aruba recientemente den un entrevista ora nan a haya premionan di Setar.
Arnold ta sigura cu e ta gusta sinti e musica di carnaval cu ta “hopi dushi mes ora mi ta baila,” y Jayven ta gusta e carnaval asina tanto cu el a bisa su mama caba cu e kier participa den Festival di Tumba tambe pa otro aña.
E historia ta cu e famianan a sinta hunto pa papia, nan a hinca tur cos den otro y nan a bisa cu nan ta apoya e muchanan unda cu nan mes a tuma e decision di participa, ora carnaval a inicia nan a sinta back, amistadnan cerca di cas a yuda pa prepara e muchanan, na unda nan a gradici Ryan Rodgers cu ta e “motor” y e persona cu a prepara Arnold y Jayven basta bon pa nan show.
“Nan ta bon prepara, nan ta sabi, nan ta gusta e locuranan aki, kiermen esey a bay hopi facil y asina nos logra cu nan por a bay participa y bay cu e titulo maximo di Prins cu Pancho Infantil Carnaval 70,” mama di Jayven, Heleeny Jansen a sigura.
Arnold ta studia na scol Montesori Nos Fortalesa y Jayven na Colegio San Jose Aruba, nan ta amigo di otro, nan ta studia na diferente scol pero e amistad y a kimica a yuda pa nan cera un bon deal “esey tabata facil, nan ta bay bon cu otro, nan ta hunga hopi sin horea, nan ta gusta actua, nan no tin miedo di nada, e baile di carnaval pa nan ta hopi dushi, tur aña nan ta bay den carnaval, aña pasa nan a bay den Don Flip tambe y tur dos a bay cu premio tambe, kiermen nan no tin miedo di presenta nan mes, di papia ni di subi stage dus el a bay hopi facil, sigur e tradicion di carnaval ta bay continua den proximo añanan,” Heleeny Jansen a bisa.
Manera el a menciona, aña pasa Jayven a gana den e categoria di Bodypiece Luhoso “Speed Racer” cu Don Flip Carnival Group conhuntamente cu su ruman muhe Zoey Jansen “Lego Princess.”
Pa finalisa, Jayven a laga e mensahe na otro muchanan cu tambe tin intencion di participa den Carnaval den proximo añanan pa “bay traha hopi riba e proceso aki pasobra e ta hopi trabou, bo mester training hopi, pero bo ta logra.”
Di su parti, Arnold a laga como mensahe “muchanan semper corda pa gosa hopi di e carnaval cu tin un dushi ambiente.”
