(AP) — Donald Trump a pone un banda lunas di critica y burla di Ron DeSantis diadomingo anochi, celebrando su ex-rival Republicano como su sostenedor di mas nobo despues cu e gobernador di Florida a caba su campaña presidencial y a sostene e ex-presidente.
Pa Trump, a bira un ritual familiar pa duna bon bini na e sosten di un persona cu antes a purba di enfrent’e. Sinembargo, tabata notable durante e rally diadomingo na New Hampshire pa mira Trump elogia DeSantis sin yam’e “DeSantimonious” of “DeSanctus,” poniendo un fin na talbes e rivalidad mas feroz di e campaña Republicano 2024.
“Mi djis kier gradici Ron y dun’e pabien di a haci un hopi bon trabao,” Trump a bisa clausurando su comentarionan. “E tabata hopi cortes y a sostene mi. Mi ta aprecia esey, y mi tambe ta anticipa pa traha cu Ron.” Trump a describi DeSantis como “un persona realmente tremendo.”
Anteriormente e mesun dia, DeSantis a bisa via un video cu e lo caba su campaña dos dia prome cu e primario Republicano, e prome na e nacion, na New Hampshire. Pero, lagando e alegria di Trump un banda, e no tabata e sosten di mas caluroso.
“Ta cla pa mi cu mayoria di votador den primaria Republicano kier duna Donald Trump otro chens,” DeSantis a bisa, dunando un analisis factual forsando un sonrisa, sin agrega elogio pa Trump. “Mi a firma un promesa pa sostene e nominado Republicano, y mi ta bay honra e promesa aki,” el a continua, prome cu lansa un critica na e contendiente restando, Nikki Haley. DeSantis a describi e ex-embahador na ONU y ex-gobernador di South Carolina como un stand-in pa “e guardia bieu Republicano di anmtaño den un forma repackaged di corporatismo recalenta.”
