Dialuna 22 di januari, Minister Albert Ramchand Ramdin di Surnam, acompaña pa un delegacion comercial a reuni cu representantenan comercial local durante Business Connect. Minister di Asuntonan Economico, Comunicacion y Desaroyo Sostenibel, Geoffrey Wever, a traves di unidad ARINA di Departamento di Asuntonan Economico a facilita un Business Connect entre representantenan comercial di Surnam y empresarionan local di retail y wholesale.
Minister Albert Ramchand Ramdin, Minister President Sra. Evelyn Wever-Croes y Minister Geoffrey Wever a adresa e delegacion comercial y informa tanto sector comercial di Aruba como esun di Suriname cu ambos pais kier pa tin mas lazonan comercial y cu nan ta stimula pa sigui explora oportunidadnan di inversion.
Durante e reunion, a resalta e compromiso di e delegacion Surnameño pa yuda facilita un mision comercial pa Surnam den e curso di e aña. E enfasis tabata riba crea un plataforma pa dialogo directo y fructifero entre empresarionan di ambos pais, y pa concretisa pasonan practico cu por beneficia e clima di inversion y colaboracion comercial.
Segun un comunicado di gobierno, e intercambio aki ta den liña cu e vision di Minister Wever y Gobierno di Aruba di promove un ambiente mas atractivo pa inversion na Aruba, y simultaneamente, di fortalese lazonan economico cu paisnan bisiña. E enfoke a keda tambe riba e importancia di mantene relacionnan economico estrecho y constructivo cu Surnam, cual por ta un oportunidad.
E combersacionnan durante e evento a demostra un entusiasmo mutuo pa explora y desaroya iniciativanan comercial nobo, y pa probecha e oportunidadnan cu e relacionnan mas cercano aki por brinda. Minister Wever a remarca cu e tipo di colaboracion aki ta fundamental pa e bienestar economico di Aruba y su rol den e region, y a enfatisa su compromiso pa sigui apoya y promove e dialogonan cu lo resulta di e encuentro aki.
