Alfredo Koolman director di WEB Aruba: “Loke a sucede diadomingo ta lamentabel, nos ta investigando pa esey no ripiti”

Diadomingo ultimo, WEB Aruba a informa cu e black-out cu a sucede e dia ey tabata debi na un fayo den motor di e planta nobo RECIP, pa esaki, director di e compania Alfredo Koolman a sigura cu incidentenan por pasa y esey ta algo cu nan ta purba evita, ademas si un usuario ta ser afecta door di e black-out pa loke ta trata aparatonan, mester acudi na ELMAR.

Alfredo Koolman director di WEB Aruba a splica den un conferencia di prensa cu “ta lamentabel e black-out di diadomingo 21 di januari 2024,” caminda el a sigui bisa cu WEB ta consciente di e inconveniencia di loke un black-out ta trece cune y nan a pidi disculpa pa esaki.

Pa 6.56am di diadomingo e motor number 18 di e planta nobo di RECIP a paga automaticamente, e motibo ta bao investigacion. Siguientemente e motor 14 cu ta compensa pa e produccion di motor 18 e frecuencia di e planta a baha abou di 59 hertz y un minuut despues, tres otro motor tambe a paga automaticamente un tras di otro, cu consecuencianan di un collapse total di e sistema. Ademas, Koolman a señala cu Vader Piet tambe a paga conduciendo na un otro black-out.

“Nos personal a bay den accion inmediatamente pa determina e causa di e procedente responsabelmente, sin cu unidad ta bolbe cay abou back, nan a lanta e planta, cuminsando cu e backup unit y den bon coordinacion cu personal di N.V ELMAR a logra recobra suministro di coriente na comunidad entrante 8am, pa 10.33am Aruba completo a haya coriente back.”

Koolman a duna un gradicimento na e comunidad pa e pasenshi, un disculpa pa e inconveniencia, esfuerso di coleganan tanto di WEB como di ELMAR na unda e incidente aki black-out ta bay ser investiga a base di un Root Cause Failure Analysis pa determina e causanan y medidanan pa evita e ripiticion.

Mester recorda cu dia 28 di december 2023, a surgi un cortocircuito den un di e transformadornan den planta di WEB lo cual a conduci na un Brown Out, un interupcion di coriente pa diferente area di e isla.

Debi na e fayo aki e sistema di pompnan cu ta pomp awa pa Aruba a perde coriente tambe y consecuentemente e presion di awa a cay pa varios parti di Aruba.

Pa esaki, Koolman a señala na Bon Dia Aruba cu loke a pasa 28 di december ta un incidente diferente, e causanan di e Brown Out ta conoci y nan ta atendiendo esey debidamente y loke a sucede diadomingo ultimo tabata den un otro parti di e planta caminda e motornan ta paga automaticamente pa protege e integridad di e motor, “si e no paga automaticamente e lo por tin dañonan cu no por recobra y tin cu busca unidadnan nobo, ta dos diferente incidente y ta lamentabel, e manera pa procede ta cu bo tin cu atende cu cada un di nan, determina e causa y tuma medidanan pa evita ripiticion.”

Mirando cu e causa ta cu e motornan a paga, a puntra si esaki ta bay sigui tuma luga caminda Koolman a sigura cu e planta nobo RECIP cu nan a traspasa na juni 2022 a conduci tambe cu nan a conoce 335 dia di aña pasa cu nan a opera e planta sin ni un problema “e ta un cuestion di haci un esfuerso, investiga, determina causanan y tuma medidanan pa esey no lo ripiti, incidentenan por pasa, esey ta algo cu nos ta purba evita, pero e planta nobo akinan 99.93% di e tempo a logra suministra 100% di e demanda cu ELMAR mester pa nos isla, nos tabatin berdad e Brown Out na final di aña pasa y durante un periodo cu nos tabatin stabilidad importante ta pa determina e motibo di e Brown Out tabata un fayo den un parti di nos planta cu ya tabatin presion caba pa 60 aña y nos ta manteniendo e parti akinan, pero e trabou ta pa nos reemplas’e lo mas pronto posibel, tambe nos tin proyectonan cu ta andando pa algun tempo caba pa reemplas’e pa busca sistemanan cu ta mas sigur, cu ta opera mas stabiel.” Koolman a bisa.

Tambe usuarionan a reporta cu presion di awa a baha y esey ta pa motibo cu nan tin un sistema cu ta depende di pompnan y na momento cu ta registra perdida di coriente, esey ta nifica cu pompnan ta paga automaticamente.

Cada biaha cu incidentenan aki di coriente ta sosode tin ciudadanonan cu ta reporta cu nan aparatonan di cas ta daña, pa esaki a puntra Koolman si pa esey ta existi un procedura na unda el a indica cu si, “nos tin un acuerdo cu ELMAR, na unda nos a palabra cu na momentonan cu usuarionan tin problemanan cu nan aparatonan nan por acudi na N.V ELMAR pa reporta e incidente of e caso di forma cu e procedura ta bay cana y finalmente ta entre N.V ELMAR cu WEB Aruba nos ta regla esey.”

Mientras tanto, Bon Dia Aruba a puntra PR di ELMAR, Audrey Croes si nan ta compensa e cliente afecta cu un suma specifico (por ehemplo 25 florin), pa esaki, Croes a sigura cu “tur claim ta ser investiga, a base di e investigacion ta yega na un suma di pago, den caso di un black-out, ELMAR ta afhankelijk di WEB su contesta riba e claim, basa riba e investigacion tambe,” el a bisa.

Di su parti, Koolman a expresa den conferencia di prensa cu nan a haya sa di e usuarionan cu e recompensa cu nan ta ricibi ta limita y nan lo percura cu e coleganan cu ta encarga pa evalua e casonan cu ta wordo reporta pa nan, lo tene na cuenta cu esey tambe.