Ayera, durante un conferencia di prensa virtual cu medionan di Reino Hulandes, Secretario di Estado pa Relacionnan di Reino, Alexandra van Huffelen a comenta tocante e Conseho di Minister di Reino cu a tuma lugar diabierna ultimo.
Relaciona cu esaki, el a confirma cu Aruba y Hulanda ainda ta negociando na mesa, pero el a bisa cu “no tin progreso”, segun un relato di noticiero online, NoticiaCla.
Inicialmente, e Secretario di Estado a sigura cu ainda ta na mesa cu Aruba pa negocia. NoticiaCla a puntra si tin progreso den e negociacionnan, pero Van Huffelen a rechasa esaki. “No tin progreso,” el a contesta.
Na mes momento, el a confirma cu for di dia 1 di januari ultimo, Aruba a cuminsa paga un interes halto pa e repago di debe cu Aruba a crea cu Hulanda pa sosten di likides durante pandemia di Covid-19. E interes aki ta di 6.9 porciento, ya cu ainda no a yega na un acuerdo pa un ley di reino pa supervision financiero (RAft.) Na momento cu yega na un acuerdo pa esaki, e interes lo baha.
A puntra Van Huffelen, mirando cu recientemente a bishita Bonaire y Corsou, pero no Aruba, si e tin un bishita na Aruba den su agenda pa futuro cercano, el a bisa cu esaki no ta e caso. Sinembargo, el a indica cu prome minister di Aruba, Evelyn Wever-Croes si ta bay bishita Hulanda “aki un par di siman” y e dos mandatario lo reuni pa papia personalmente.
