Durante conferencia di prensa siman pasa, Minister di Transporte, Integridad, Naturalesa y Asuntonan di Adulto Mayor (TINO), Ursell Arends a elabora ariba e iniciativa di Baki den Bario cual ta forma parti di e campaña nacional Limpi Limpi.

E ministro a cuminsa na duna resumen di Baki den Bario 2023. Durante e 11 fechanan di Baki den Bario 2023 a conta mas cu 4998 vehiculo cu a bin haci uso di e evento y a logra colecta 781 baki di desperdicio. Tene na cuenta cu e cantidad di vehiculo ta exclui e conteo di e prome actividad na San Nicolas.

Segun Minister Arends e tabata 11 dia intensivo, unda cu di madruga e team a prepara na e localidad. Un team cu pa oras largo riba pia den solo cayente a para cla pa yuda e comunidad. Esaki ta un esfuerso conhunto pa por a atende un averahe di 500 vehiculo cu a trece nan sushi. “E team di Baki den Bario a demostra sincronisacion y dedicacion cual sigur nos ta orguyoso di mira,” Minister Arends a reacciona.

Parti di e meta di campaña nacional Limpi Limpi, bou di cua Baki den Bario ta forma parti di, ta pa conscientisa nos habitantenan acerca di e procesamento responsabel di desperdicio. E gran acogida di Baki den Bario den nos comunidad ta un muestra cu Aruba ta cla pa separa y adopta habitonan mas sostenibel di anda cu nos desperdicio.

Durante 2024 nos lo organisa Baki den Bario un biaha pa luna, na diferente districto/bario. Diaranson siman pasa Minister Arends a reuni cu e partnersnan pa haci evaluacion y scoge e dianan pa 2024. Districto y localidad cu a scoge ta basa riba e experiencia di ultimo aña pero tambe datos y experiencia di pasado, relatando na desperdicio produci den cada bario cual ta inclui cantidad di vivienda/famia den e bario.

“Mi a tuma e decision pa continua cu Baki den Bario despues di a analisa sentimentonan den nos comunidad cu ta expresa e necesidad pa e iniciativa aki y basa riba demostracion cu nos comunidad ta dispuesto pa separa. Nos ta dispuesto pa transiciona pa un maneho di desperdicio cu ta cuadra cu e tempo cu nos ta bibando aden. Maneho di desperdicio ta keda un responsabilidad comparti. Gobierno di Aruba ta facilita manera pa deshaci di bo desperdicio y abo como ciudadano mester haci di bo parti pa separa y deposita esaki debidamente pa wordo procesa. No solamente durante e actividad di Baki den Bario pero mester ta consciente di bo desperdicio tur dia,” Minister Arends a enfatisa.

Ariba e website www.limpi.aw por haya tur informacion di e fechanan di Baki den Bario 2024 y tambe pa mas informacion di unda pa hiba bo desperdicio.

E prome dia di Baki den Bario pa e aña aki lo ta 27 di januari 2024 na Compleho Deportivo Pos Chikito. Orario ta keda di 7’or pa 11’or di mainta. Prepara y separa bo desperdicio di antemano.

Ministerio di Naturalesa lo sigui e proceso di Baki den Bario di cerca pa asina keda mehora e actividad y su efectonan ariba nos isla.

Minister Arends a termina gradiciendo tur cu a contribui na Baki den Bario pa nan trabou grandi y significativo. Aruba henter a tuma un paso importante den e bon direccion y hunto nos lo crea un isla cu un maneho di desperdicio mas sostenibel y responsabel.