Ayera mainta Minister di Transporte, Integridad, Naturalesa y Asuntonan di Adulto Mayor, Ursell Arends a tene un conferencia di prensa pa anuncia e inicio di e proyecto di agroforesteria sintropico na scolnan basico. El a anuncia cual ta e scolnan cu lo ta participando y e prome scol cu ta bay ricibi e hardin di alimentacion.

El a splica cu e proyecto di agroforesteria sintropico ta un proyecto unda e scolnan cu ta participa ta ricibi sosten tanto for di Santa Rosa Aruba y Living Soil, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel

Minister Arends a indica cu Ministerio di Naturalesa ta financia e proyecto aki y ta trahando conhuntamente cu Santa Rosa Aruba y Living Soil den e proyecto aki pa duna guia y sosten na e scolnan y tambe duna guia y sosten pa loke ta trata e materialnan pa haci e proyecto aki posibel.

E mandatario a agrega cu e personal di e scolnan y e boluntarionan lo ricibi training pa asina ta mas informa y prepara pa e tecnica di agroforesteria sintropico, tanto pa e mantencion y cuido, pero tambe pa plantacion di matanan. Alavez lo traha tambe ariba implementacion di esaki den e curriculum escolar.

Minister Arends a menciona cu manera ta conoci caba, aña pasa dia 1 di november Gobierno di Aruba a lansa e proyecto aki y a lansa e plataforma cu a duna oportunidad na e scolnan basico pa registra y participa na e proyecto aki.

El a splica cu e plan tabata pa scoge un total di 10 scol basico, pero mirando cu un cantidad grandi di scol a inscribi, gobierno a scoge e ora un total di 13 scol pa forma parti di e proyecto aki, 13 scol basico y tambe IPA.

E scolnan basico cu ta bay ta participando den e proyecto di agroforesteria sintropico ta Scol Basico Washington, Scol Primario Kudawehca, Colegio Hilario Angela, Colegio Conrado Coronel, Pius X School, Scol Caiquetio, Sint Paulus School, Play2Whizz Campus, Scol Basico Dornasol, Scol Paso pa Futuro, Mon Plaisir School y Grof Van Zinzendorf.

El a indica cu IPA tambe ta bay ta participando pa e maestronan conoce e tecnica di agroforesteria y e importancia pa loke ta trata e sector primario. Di e forma aki conhuntamente cu e maestronan cu ta den preparacion pa guia e futuro generacion, nan tambe por yuda inculca e importancia di agricultura den e muchanan.

E mandatario a informa cu e prome scol cu ta bay ricibi e hardin di alimentacion ta Scol Basico Washington y esaki ta tuma luga awe, diasabra 20 di januari. El a agrega cu e proyecto di plantamento lo core for di januari te cu juni 2024.

“Di aworaki caba mi kier haci un yamada na henter comunidad di Aruba pa hunto ban contribui, ban yuda, ban ta boluntario na e proyecto aki pa asina nos por crea e hardinnan di alimentacion na e 13 scolnan aki,” Minister Arends a remarca.

Sr. Ludwig Rasmijn di Santa Rosa Aruba a splica cu di parti di Santa Rosa for di cuminsamento nan ta envolvi den e proyecto, hunto cu Living Soil, den e partinan relaciona cu loke ta trata e ekipo- y mashin. El a agrega cu Santa Rosa ta sostene plantacion, cuminda saludable, y e proyectonan cu tin na scolnan.

Den e parti ey di parti di Santa Rosa, nos tur ta duna di nos banda. Tambe cualkier otro tayer, cualkier otro enseñansa cu nos por duna di parti di plantamento, di parti di comemento saludable, nos di Santa Rosa semper ta dispuesto pa yuda cu esey,” Rasmijn a remarca.

Sra. Rose Barros, di Living Soil Aruba a splica cu na mei di 2022 Living Soil a realisa un di e prome proyectonan di agroforesteria na Prinses Amalia School. Minister Arends a bishita e proyecto y a expresa cu esey ta loke tur e scolnan basico na Aruba tin mester y aworaki e proyecto di agroforesteria sintropico na scolnan basico ta un realidad.

Barros a sigui splica cu e manera cu nan setup e proyecto ta cu e ta yuda cu e trainingnan y a haci e prescreening di e scolnan. E ta encarga pa train tur e hendenan cu ta envolvi profundo cu e agroforesteria sintropico y ta yuda e scolnan despues tambe ariba con pa implementa esaki den e curriculum di e scol.

El a agrega cu durante e proyecto el a ricibi ayudo di DOW cu a habri e localidad di green waste pa asina nan por busca palo pa por realisa e proyecto.

“Cada scol ta ricibi tur e ayudo for di nos, pero nan tin mester di bo ayudo tambe. Nan tin mester di hopi mata, cualkier tipo di desperdicio di hardin, trece na e scolnan. Nan tin mester di dje aworaki, pero tambe a largo plaso,” Barros a remarca.

Minister Arends a splica, contestando pregunta di miembro di prensa, cu Gobierno di Aruba a compromete pa financia e proyecto aki mirando cu e vision di gobierno pa agricultura na Aruba ta pa crea un sector comercial, un pilar economico nobo.

El a enfatisa cu pa logra esaki mester cuminsa cerca e futuro generacion, cu ta esnan cu ta bay yuda pusha esaki. Cu e proyecto aki, gobierno ta bay cuminsa stimula e futuro generacion aki y laga nan cera conoci cu tecnica sostenible di agricultura.

“Na Prinses Amalia ya caba e muchanan ta come for di e hardin di alimentacion aki y e cuminda cu nan ta come tambe ta saludable, esey tambe tin e ripple effect na unda cu nos ta bay haya hobennan cu ta bay biba mas saludable door di come mas saludable, pero mas cu tur cos, tin e balor, aprecio y pasion pa agricultura,” e mandatario a remarca.