Ayera den Corte den Prome Instancia a trata e caso penal contra e homber di inicialnan C.A.v.A. di 35 aña di edad, na ken Ministerio Publico a pidi un castigo incondicional di seis aña y Terbeschikkingstelling (TBS), ya cu e persona aki ta sufri di un trastorno psikiatrico.

Segun e comunicado di prensa, e sospechoso aki ta ser acusa di tabata provoca hopi mucha muhe jong pa haci actonan sexual cu nan. E tabata manda e muchanan muhe mensahenan cu pregunta si nan kier gana placa of si nan kier sali den un photoshoot.

Ademas di esey e tabata manda nan potretnan di un curpa di homber stijf. Cu otro muchanan muhe e tabata warda nan na nan scol y tabata masturba den nan presencia. Cerca un par di mucha muhe el a yega te violacion sexual.

Ademas ta acusa e sospechoso di a haci sex cu dos mucha muhe menor di edad y di tabatin porno infantil den su posesion.

E sospechoso a ser examina pa un psikiatra y un psicologo unda nan a constata cu e tin un trastorno psikiatrico, pa cual e lo mester tratamento.

Ayera fiscal di husticia a exigi un castigo incondicional di 6 aña contra V.A., ademas (cu bista riba e conseho di e dos expertonan) tratamento obligatorio den forma di un TBS cu condicionnan.

Esey ta encera cu V.A. lo tin cu sinta su castigo di prison pa despues mester sigui tratamento obligatorio pa tempo largo. Hues lo dicta sentencia aki tres siman.

Kico ta TBS?

Terbeschikkingstelling, miho conoci como ‘TBS’, ta un medida cu un hues ta duna pa protege comunidad contra hende cu ta comete crimennan mientras nan ta padece di un trastorno mental grave of di falta di desaroyo cognitivo pa distingui kico ta bon y kico ta malo.

Ta existi dos tipo di TBS, un cu ta mara na condicion y otro cu ta tratamento obligatorio.

E condicionnan cu hues ta tuma na cuenta pa un persona haya TBS ta cu e autor a comete un delito cu un castigo di prison di por lo menos 4 aña of mas, e autor tabata padece un trastorno di personalidad, psicosis of discapacidad intelectual ora el a comete e delito y e ultimo condicion ta cu e seguridad di otronan ta den riesgo debi cu e autor lo por comete e mesun tipo di crimen un biaha mas.

Na Aruba, e prome biaha den historia cu un hues a duna como castigo TBS tabata na aña 2017 ora Gabriel M., cu tabata padrastro di dos mucha chikito (Rishandroh Anastacia y Rishandrick E. Frans), a wordo haya culpabel di maltrata nan cu consecuencia cu nan a fayece. El a keda sentencia cu 15 aña di prison y TBS obligatorio, pero na e momentonan aki te ainda ni Aruba ni paisnan di Caribe Hulandes ta conta cu un centro psikiatrico forensico.