(AP)—E Union Africa (UA), Union Europeo (UE) y Merca a haci un yamado diahuebs pa un alto el fuego inmediato y dialogo constructivo entre fraccionnan den guera na Sudan. E gruponan tambe a haci un yamado pa un fin di e tension entre Somalia y Ethiopia tocante un acuerdo firma entre e region Somaliland di Ethiopia y Somalia.
Representantenan die grupo, ken a papia na Kampala, Uganda, despues di e reunion di un bloque regional oost-Africano, a bisa cu e dos crisis ta menasando stabilidad regional den e Somali Peninsula, tambe conoci como “Horn of Africa.”
E forsanan arma di Sudan y e rival Rapid Support Forces ta luchando pa control di Sudan desde april aña pasa. Tensionnan di basta tempo a resulta den batayanan riba caya den e capital y otro areanan incluyendo e region Darfur.
AU, EU y Merca, y E Organisacion di Nacionnan Uni (ONU) a nota cu e bringamento a resulta den 7 miyon hende sin cas y a mantene 9 miyon mucha sin estudio. Michael Hammer, un envio special di Merca pa e peninsula, a haci un yamado riba e fraccionnan na Sudan pa adheri na nan obligacion bao ley humanitario internacional y pa cumpli cu compromisonan pa stop e pelea.
El a papia despues cu e bloque regional Intergovernmental Authority on Development, of IGAD, a tene un reunion di emergencia di lidernan di estado na Kampala pa discuti e guera na Sudan y e tension creciente entre Somalia y Ethiopia. Hammer a bisa cu e lider di e ehercito Sudanes, General Abdel-Fattah Burhan, y e comandante di e para-ehercito Rapid Support Forces, General Mohammed Hamdan Dagalo, ken ta conoci como Hemedti, mester cumpli cu nan promesa dia 9 di december na e cumbre di IGAD pa yega na un alto el fuego incondicional. “Nan lo ser responsabel pa e kiebre di Sudan si e conflicto aki continua,” segun Hammer.
E prome stap ta un alto el fuego implementabel cu por ser monitoria, segun Ramtane Lamamra, e envio di ONU pa Sudan. Diamars, e gobierno Sudanes a suspendi relacion cu e bloque regional den oost-Africa, acusando e di viola soberania Sudanes por medio di invita e lider paramilitar na e cumbre. Hemedti a asisti e cumbre diahuebs na Kampala pero no a papia.
Entre e yamadonan renoba pa un alto el fuego, ONU a anuncia diahuebs cu e Fact-Finding Mission di ONU riba Sudan, cual ta encarga di investiga violacionnan di derecho humano y ley humanitario internacional desde 15 di april, a cuminsa su trabao e siman aki.
Mohamed Chande Othman, e presidente di e mision, a bisa cu investigacionnan di supuesto violacionnan pa e forsa arma Sudanes, Rapid Support Forces y otro partido den guera ta andante, y atencion lo ser duna riba violencia sexual y otro violacionnan contra hende muhe y mucha, segun vocero pa ONU, Stephane Dujarric.
E Conseho di Derecho Humano di ONU a establece e mision na october 2023 cu e meta di sigura cu esnan responsabel pa violacionnan di derecho humano y ley humanitario internacional enfrenta husticia. Dujarric a bisa cu e mision lo presenta un rapport oral riba su prome descubrimentonan na e sesion di conseho cu ta cuminsa na juni.
Pa loke ta trata Somalia, UA, UE y Merca a bisa cu nan ta reconoce e soberania di e pais, unidad y integridad teritorial, incluyendo e region di Somaliland. Tensionnan a aumenta despues cu Ethiopia a firma un acuerdo di 1 di januari cu Somaliland pa dun’e acceso na lama. Somaliland di su parti ta anticipa cu Ethiopia lo reconoce e region como un estado independiente, cual ta frustra Somalia.
