CARRYING CAPACITY 2.0… Estudio di ATA bon pero laat…

Recientemente a sali e analisis cu Aruba Tourism Authority (ATA) a traha di e situacion actual encuanto nos capacidad di carga, tambe en vista di e plannan menazante di creacion di miles di camber di hotel extra, y ki impacto esaki lo bay tin riba nos medio ambiente, economia y bida social. En general por bisa cu e conclusionnan di e informe ta indica den mesun direccion cu e informenan di añanan anterior… Si bo conclui cu e titulo y lineanan introductor aki ta di un Editorial actual encuanto e estudio cu Aruba Tourism Authority (ATA) a publica den e dianan aki, nos ta informa bo cu no ta asina… Esaki ta inicio di un Editorial publica dia 08 di october 2018, reaccionando riba un publicacion similar di e mesun entidad turistico.

Kico nos kier bisa cu esaki? Cu e ta ilustra cu den mas di cinco aña nos no a avanza nada cu e tema aki, salvo e cifranan actualiza. Es mas, nos ta 20 aña despues di e proyecto Carrying Capacity, cu awe ainda ta ser usa pa e autoridad turistico den e asunto aki. Y e unico respuesta di nos politico y mandatarionan mientras tanto ta: aproba mas permiso pa hotel y condominio. Nunca nos a mira den tur e añanan aki un pida papel unda gobierno ta atende e asunto aki, cu gran parti di publico local si ta mira. Di tur manera, awor nos ta cinco aña mas leu y nos lo mester atende e problemanan di awe. Esaki ta implica cu banda di e cifranan positivo cu sigur ta presente, nos mester tin oido tambe pa e indicacionnan menos positivo, cu sigur ta presente. Si nos a scucha y/o lesa bon kico e asociacion empresarial di sector turistico AHATA ta bisa recientemente, nos por nota cu sector hotelero a mira na 2023 resultado positivo pa loke ta RevPar (Revenue Per Available Room) y ADR (Average Daily Rate), pero esey a pesar di un grado di ocupacion menos bon cu na 2019. De hecho ocupacion na 2023 tabata 8% menos cu na 2019. Pa 2024 perspectiva ta cu ocupacion promedio lo ta 78%, loke tambe ta 8% menos cu 2019. Awor, nos por argumenta cu esey no ta bisa tanto, pasobra en total a yega hopi mas turista cu na 2019 y economia ta probecha di nan tur, sin importa unda nan ta keda. Pero esey no ta tur. E asociacion a declara tambe su preocupacion, na un manera masha suave y diplomatico, pa e situacion entorno costo di operacion di e sector. Ta señala cu mas entrada a base di prijs pa camber mas halto no ta refleha ganashi… Y ta indica tambe cu na 2023 costo di operacion “a conoce aumento grandi, specialmente pa motibo di medidanan di impuesto nobo”. Aki tambe e critica superficial por ta cu e medidanan ta conta pa tur empresa, no pa sector hotelero so. Esey ta berdad pero no ta yuda pa comprende e materia aki.

Ban bolbe un rato na e estadisticanan basico. Si nos a haya 1.243.554 turista ‘stayover’ na 2023, como 11% mas cu na 2019, y hotelnan tin ocupacion mas abao, unda e turistanan a bay anto? Esey den e estudio actual cu nos autoridad turistico ATA a entama, ta keda clarifica. Nos por a mira un crecimento considerable di e sector di acomodacion alternativo, bao di e denominacion ‘Short Term Vacation Rentals’. En corto esaki ta tanto e condominionan disponible pa acomoda turista, como e demas acomodacion di apartamento, etc. Por nota un aumento fuerte den e categoria aki, cu recientemente lo a yega na mas di 3.700 unidad cu un capacidad di mas di 17.000 persona.

Unda maneho a keda?

E pregunta clave aki ta si e desaroyo aki ta duna preocupacion como competencia comercial pa e sector hotelero. E ta competencia, pero e ta parti di un desaroyo mundial cu ta dificil pa detene, si acaso esey lo tabata e obhetivo. Nos tur por a tuma nota di e desorden cu a surgi na lugarnan turistico manera Amsterdam, unda gobierno Hulandes ta obliga di interveni. Sin duda algun nan lo haci esey tambe, pero mas interesante ta kico lo ta e maneho aki na Aruba. Maneho, cual maneho? Nos a yega di mira maneho? Nos a mira en berdad e preocupacion di ATA na 2018 pa e desaroyo di e tempo ey caba, pero den e añanan despues, te awe, kico nos a ripara? No cu ta nan so ta responsable pa maneho, pesey tin un mandatario designa… Loke mester sucede awor, aunke cu hopi tardanza den e proceso aki, ta un maneho cu ta indica con ta bay anda cu interes economico di cada sector. Regulacion mas detaya di e sector di ‘vacation rentals’ ta necesario, tambe pa atende e problema creciente di ocupacion di vivienda pa crea espacio pa acomoda turista, mientras e pais ta sclama pa vivienda pagable. Aki tambe nos mester nota cu no tin maneho…

Por ultimo, unda si tin maneho? Esey sin duda algun ta riba tereno di cobra impuesto. Naturalmente tur gobierno lo cobra impuesto y cerca nos, cu e situacion di debe publico, nos no ta excepcion. Sin embargo, e medidanan tuma a conduci na aumento considerable di costo di operacion empresarial, mientras gobierno a priminti baha ‘cost of doing business’… Ademas e factor principal di incertidumbre actualmente ta cu no ta conoci cuanto acomodacion mas ta bin acerca mientras grado di ocupacion no ta mehora, un tendencia general den Caribe. Pregunta: si nunca tabatin maneho, de repente awor si ta bay tin…?