Parlamentario Marisol Lopez-Tromp tocante caso Arubahuis: “Pa politiconan activo of inactivo di MEP, aparentemente tin otro reglanan”

Ayera Ministerio Publico a informa cu diamars ultimo un persona a keda deteni den relacion cu caso di Arubahuis, cual Landsrecherche a denomina como “Tulipan.” Den esaki, parlamentario di partido MAS, Marisol Lopez-Tromp a duna su punto di bista, na unda e ta cuestiona cu pa politiconan activo of inactivo di MEP, aparentemente tin otro reglanan ora ta trata di investigacionnan penal.

Den un comunicado di prensa ricibi di Ministerio Publico e dia di ayera, a duna di conoce cu den un investigacion di Landsrecherche, un homber di inicialnan G.Y.L. a keda deteni diamars ultimo.

E investigacion aki di Landsrecherche, bao nomber di Tulipan, ta dirigi riba iregularidadnan cu a tuma luga na Arubahuis den e periodo di 2018 te cu 2021. E sospechoso L. tabata traha e tempo ey como director suplente di Arubahuis. Ministerio Publico tambe a indica cu e investigacion aki ta andando y no ta exclui mas detencion.

Pa esaki, Bon Dia Aruba a haya reaccion di parlamentario Marisol Lopez-Tromp, ken despues di a lesa e noticia di ayera di e caso di Arubahuis, a afirma cu no ta di awor sino di mas di un aña y mey pasa cu fraccion di MAS, ora nan a bin compronde cu tabatin asuntonan di fraude y iregularidad na Arubahuis, a cuminsa haci pregunta na prome minister Evelyn Wever-Croes, pa motibo cu esaki ta su cartera.
“E tempo ey nos a haci varios pregunta, nos a pidi informacion di Arubahuis. E enfoke e tempo ey tabata mas tanto riba Besaril, y mi por bisa tambe cu na varios ocasion nos a puntr’e si tabatin investigacion cu lo tabata andando, entre otro di parti di Centrale Accountantsdienst Aruba (CAD). Como fraccion tambe nos a pidie varios biaha e rapport di CAD na unda el a bisa parlamento y den prensa cu e rapport no tabata cla. E tabata e mesun asunto di investigacion riba placa, uso di credit card, entre otro. Nos a haya sa despues cu el a gaña nos, pasobra el a bisa cu e rapport no tabata cla y cu lo tabatin mas investigacionnan andando den mas departamento.”

Pero CAD a haci un rapport riba su mes, cual tabata cla for di basta tempo caba, manera Lopez-Tromp ta sigura. “Kiermen pa ora e presentacion a bin parlamento – na december 2022 a bin un presentacion den parlamento caminda cu a haci cu e ora ey e rapport lo a keda cla. Pero e realidad tabata cu e rapport tabata cla for di januari caba di e aña ey, loke ta nifica cu na comienso di aña, ora nos a cuestion’e, e no a papia e berdad cu nos. Y nos ta kere cu bo no por gaña parlamento, y e trato, den nos bista diferente y preferencial cu Besaril a haya, den nos bista ta cu el a haya un oportunidad pa bay paga back. Loke nos a cuestiona ta con esaki por a tuma luga sin cu un keho a ser entrega? Y ya caba tin un procedura caminda cu e ambtenaar of minister ta haya oportunidad pa paga back, y nos a cuestiona tambe dicon no tabatin un keho penal entrega,” el a señala.

Prome minister a haya un e-mail anonimo, unda e no por a actua na e momento ey debi cu no tabatin hechonan concreto. Despues el a haya un otro e-mail di ekipo di Arubahuis na Hulanda splicando cu nan tabatin sospecho fuerte cu ex-minister Guillfred Besaril conscientemente no tabata actua a base di ley di contabilidad.

Den esaki, no solamente el usa e credit card cu ta propiedad di pais Aruba, tambe el a huur un propiedad na Hulanda unda a drecha hardin y cura di e cas, a pone un sistema di alarma pa 10.900 euro y a haci reparacionnan den e mesun cas na un costo di 21.000 euro na aña 2020. Tambe otro gastonan excesivo di parti di e ex-minister a keda confirma.

Lopez-Tromp a señala tambe cu el a puntra si tur otro persona cu a comete algo similar, si nan tur lo haya chens pa paga back sin cu nan haya un detencion, sin haya un caso penal, sin cu tin un keho entrega y cu nan lo por sigui traha y hasta bay eleccion. “Pasobra nos tin entendi cu no ta di awor e iregularidad aki a inicia. Con por ta cu e politico aki por a bay eleccion mientras cu prome minister tabatin indicacion caba cu tabatin iregularidad?”

Den su opinion, e ta haya cu “awor ta sali un caso mas di Arubahuis siendo cu prome minister a bisa cu el a reorganisa y muda Arubahuis, laga haci investigacion. Pero e caso aparentemente a continua. Y husticia tin cu haci su trabao. Loke ta keda graba ta cu el a sconde e rapport di CAD, gaña cu e rapport no tabata cla y alabes duna un trato diferente na un persona cu tabata politico riba lista di MEP,” Lopez-Tromp a expresa.

Pa su persona, loke ta ambtenaar y hende en general “ora nan haya nan mes den tipo di casonan asina, prome cos cu ta pasa ta cu den full e maneho di integridad cu supuestamente tin ta actua riba esaki, bo ta haya cu e persona a ser schors, ta bin investigacion riba nan, keho ta ser entrega riba nan. Pero segun mi informacion, te cu ultimo, niun momento prome minister a bisa cu el a entrega un keho. Y el a tarda asina hopi pa yega na supuestamente entrega di keho, cu hasta el a entrega un supuesto rapport na Ministerio Publico pa wak si nan ta haya cosnan penal riba dje. Mi ta puntra mi mes, ley pa un no ta ley pa tur? En todo caso, pa politiconan activo of inactivo di MEP aparentemente tin otro reglanan y p’esey m’a cuestiona mas cu un aña pasa e procedura diferente cu nos a wak den e caso aki, ” el a bisa.

Pa finalisa, el a sigura cu ta bay keda pendiente di e caso, debi cu ta trata di e cartera cu ta resorta pa prome minister y tambe pa Ministerio di Enseñansa. “Pa nos ta resalta cu e ta bin hopi bes parlamento ataca tur sorto di hende, acusando y sushando hende nan nomber, papia di cosnan di onderzoek manera e mes ta Ministerio Publico, pero ora cu ta algo cerca di dje ta un kietud total,” el a finalisa.

Potretnan ta di Facebook di e parlamentario y di Arubahuis.