Cu retraso di cuatro luna, CAft a ricibi reportahe financiero di segundo trimester 2023 di gobierno di Aruba. Den nan comentario e colegio supervisor financiero a lamenta cu gobierno no por mantene su mes na e terminonan prescribi pa ley y ta spera mehoracion den futuro pa entrega di reportahe.

 

Segun CAft e entrega structuralmente retrasa di reportahe ta limita e posibilidad di por evalua si e presupuesto ta realistico o cu e mester adaptacion ainda durante e mesun aña. Ademas CAft ta haya cu e falta di cifra actual tocante realizacion di presupuesto ta limita e derecho di parlamento di supervisa presupuesto (‘budgetrecht’).

E cifranan publica awor, en todo caso esunnan mas importante di entrada gubernamental, a keda publica caba durante 2023 pa Banco Central, y riba cual BDA a reporta. Por observa cu e entrada tabata asina fuerte, cu CAft ta comenta cu esaki por resulta den entre 60 pa 80 miyon florin mas halto cu e sumanan adapta den e di dos presupuesto complementario pa 2023. E posibilidad aki lo trece e total di entrada pa 2023 na un nivel di (casi) Afl. 1.700 miyon. Cu esey gobierno di Aruba ta mas cu cumpli cu e norma pa presupuesto na 2023, logrando posiblemente un surplus di entre Afl. 170 y Afl. 190 miyon. Esaki, compara cu e GDP nominal pa 2023 cu gobierno ta maneha (Afl. 6.526 miyon), lo yega anto na entre 2,6% y 2,9%, mientras e minimo legal ta 1% di GDP. CAft ta conseha pa usa e entrada extra aki completamente pa reduci debe, ya cu segun e organismo, no ta realistico mas pa usa parti di e fondonan pa inversion, pa motibo cu tabata asina laat den aña caba. Tambe ta conseha pa adapta presupuesto 2024 a base di e resultado aki.

Entrada te juni 2023

Pa loke ta entrada di impuesto, 81% di e total, principalmente loonbelasting, winstbelasting y BBO/BAVP ta e mayor contribuyentenan na e aumento aki. Pa e BBO, esey ta solamente e extra 1% introduci na januari 2023, no e BBO na frontera cu a bin den e di dos parti di aña. E otronan ta producto di e mehoracion di actividad economico na 2022 y 2023, unda por nota tanto mehoracion di salario y registracion oficial fuerte di empleado durante 2023. CAft ta constata cu entrada cu no ta impuesto ta kedando atras compara cu presupuesto, pasobra varios entidad liga na gobernacion no ta pagando nan dividend na tempo. Ta menciona ATA, Utilities, Setar y CBA y ta urgi nan cumplimento cu nan compromiso.

Gasto te juni 2023

Gasto total di gobierno tambe a aumenta, principalmente pa loke ta gasto di personal y interes riba debe. CAft tin critica riba maneho di gasto di personal, 32% di e total di gasto, unda por a constata cu pago di overtime a bolbe aumenta. E riesgo ta segun CAft cu lo no cumpli cu e norma pa gasto di personal si no tin accion specifico pa esaki. CAft ta recomenda pa tuma medida structural pa baha gasto di personal. (Datonan di e reportahe di gobierno ta mustra cu desde mitar di 2022 a reduci cantidad di fulltime empleo gubernamental cu 120 puesto, ademas cu no tin mencion mas di ningun puesto di Sociaal Crisis Plan; red.).

 

Gasto di bienes y servico ta e categoria cu si a conoce reduccion, loke no necesariamente ta un bon señal. CAft ta declara cu no tin claridad si e reduccion den gasto aki ta debi na berdaderamente menos gasto, o cu ta trata di un retraso den compromiso haci. Si ta trata di un tendencia structural di no usa presupuesto, anto lo mester baha e gastonan presupuesta structuralmente.

Interes riba debe gubernamental tambe a aumenta den promer parti di 2023 cu Afl. 9 miyon, contribuyendo asina na e posicion como e di dos gasto mas halto pa gobierno (15% di total). Segun presupuesto adapta pa 2023, interes lo yega na Afl. 263 miyon. Gasto planifica pa inversion mientras tanto ta kedando atras, unda te cu juni 2023 a inverti solamente Afl. 1 miyon, sin atende e otro Afl. 46 miyon cu tabata programa. Aki tambe e recomendacion di CAft pa structuralmente aumenta e nivel di inversion.

Administracion financiero

CAft ta enfatiza un biaha mas e necesidad di mehora reportahe di ehecucion y responsabilizacion, manera reportahe periodico y cuenta anual. Segun Caft, gobierno ta alega cu falta di personal capacita y recurso financiero ta hunga un papel den esaki. Den cuadro di e Landspakket y e planificacion pa administracion financiero ta trahando hunto cu Tiijdelijke Werkorganisatie (TWO) riba mehoracion, loke a resulta mientras tanto den entrega di cuenta anual pa 2019, y cu perspectiva pa fin di 2024 termina cu e retraso.

Debe publico na mitar di 2023 tabata na Afl. 5.630 miyon, loke segun CAft ta duna un porcentahe di 82% di debe/GDP nominal. CAft ta observa cu mientras e corelacion debe/GDP ta bahando mas tanto pa via di e aumento di GDP, crecemento economico, Aruba lo por logra, cu e entradanan extra observa, reduci debe segun e obhetivo di 70% na 2027. Pa esey lo mester mantene si e gastonan bao control.