Informacion oficial corecto… Instrumento o arma…?

Ministro encarga cu Asunto Economico a anuncia innovacion den recoleccion, administracion y disponibilidad di informacion importante pa institucion, negoshi y ciudadano individual. Un iniciativa apropia cu no mester a tarda mas, pasobra tin hopi di mehora actualmente. Un solo vistazo riba website di Oficina Central di Estadistica (CBS) ta mustra nos cu falta bastante informacion, ta actualiza na tempo. Por ehemplo, no por haya informacion detaya di poblacion pa aña 2023, ya cu e ultimo boletin demografico ta di tercer trimester 2022. Algo straño pasobra den ultimo añanan nos tabatin e impresion cu e informacion specifico aki tabata yega riba website cu mas regularidad. Riba e homepage por aprecia cu na 2019 nos GDP tabata Afl. 6078 miyon, ademas menciona como ‘cifra preliminar’… Segun nos despues tabatin 2020, 2021 y 2022, y hasta por a spera un calculo – preliminar – di 2023… Nos tin e leve impresion cu nos no ta pidiendo demasiado na e momento aki, y ta keda pendiente di e logronan di e proyecto aki.

E falta di cifra na tempo no ta toca solamente e departamento di estadistica, aunke cu e ta keda un pieza clave den mehoracion, pero ta abarca varios otro instancia. Por ehemplo, desde cu gobierno a publica e promer rapport financiero trimestral pa 2023, nos no a mira nada mas. Awor, nos ta na altura di e cambio di ley di supervision financiero (LAft) cu ta haci cu ta bay tin solamente dos reportahe pa aña envez di cuatro, loke nos ta haya un perdida, pero cu ta iremediable. Sin embargo, nos no ta na altura cu esey lo ta algo retroactivo y realmente lo mester a haya informacion di 2023 manera ley tabata prescribi te 31 di december 2023. Ademas, nos a kere cu ta dilanti nos mester bay y no atras, y cu realmente tur informacion na nivel di economia y finanzas publico mester logra un avance den disponibilidad mas tempran posible. Esaki no ta djis un deseo di nos como medio di comunicacion, sino cu ta esaki ta loke e propio mandatario encarga cu asunto economico lo kier logra. Contal cu loke nos por a observa durante 2023 ta cu ni Banco Central tabatin informacion financiero di gobierno cu tabata surpasa juni 2023; casi seis luna sin ningun update… Ta te den december 2023 CAft a haya e rapport di segundo trimester 2023 pa trata, di cual nos debe un relato ainda. En todo caso, tabatin algun inconveniente cu e tardanza, pero esaki lo a keda suheto na comunicacion ‘discreto’ entre e actornan di alto nivel aki, na cual nos no tin acceso. Ta yega un dia si cu mester duna cuenta ta con nos ta sigui avanza, o cu nos ta keda tuma paso estilo di cangreu sin yega na e obhetivonan formula.

Otro caso insatisfactorio ta parlamento di Aruba. A logra porfin cu e sistema di informacion online ta funciona, y por cierto a ‘load up’ 5 set di documento di 2022 y 2023, cu ta relaciona cu diferente presupuesto. Nos ta contento cu esey, pero ta surgi e pregunta tambe ta kico a haci cu tur e documentacion cu tabata disponible te den aña 2016? Tur esey a bay perdi? O e ta poni ainda riba un otro computer o server, y no tin fin pa pone tur esey na unda e mester ta? Pa tanto aña cu mester a soporta cu no tabatin absolutamente nada disponible na Staten, un poco diligencia den atende e asunto aki lo no mustra malo.Nos sa cu varios parlamentario, especialmente esunnan cu ta apoya gobierno, ta gusta zundra politico Hulandes. Esey ta nan derecho, pero pa loke ta informacion como medio di comunicacion, nos tin mas acceso na parlamento Hulandes cu esun di nos mes aki na Aruba. Ki dia ta drecha esey?

Mester ta claro pa cualkier persona cu e proceso señala aki, di decision bon tuma pa logra progreso den acumula y pone disponible informacion publico, no sin mas ta bay combati e problema cu desde semper a usa informacion politicamente, no como un instrumento sino como un arma di desinformacion. E ehemplonan cu nos a menciona awor, y den cual nos ta spera mehoracion, ta un parti chikito di e informacion cu obligatoriamente gobierno mester procesa y publica. Como ehemplo nos por menciona henter e paquete di tratado di International Labora Organization (ILO), di cual varios, si no ta tur, tin inclui e publicacion obligatorio di e rapportnan traha. Nos a yega di mira, den e ultimo 30 aña, publicacion di siquiera 1 rapport asina? Nos por menciona tambe e tratadonan cu ta toca medio ambiente, cu tampoco ta formula di tal forma cu ta permiti gobierno(nan) di warda nan den lachi, y na yabi. Si nos mira e tipo di asunto corectamente, nos ta realiza nos mes cu esakinan no ta propiedad di gobierno, sino patrimonio di pueblo; nos tin derecho di informacion.

Awor, claro, cu gobierno lo argumenta cu ta pesey tin un ley segun cual por pidi, hasta demanda documentacion publico (LOB). Esey ta berdad, pero aki tin dos punto pa tuma na cuenta Uno, esey ta pa documento specifico unda no ta trata di documento cu gobierno mester publica. Dos, e experiencia ta cu gobierno(nan) ta move cielo y tera pa no mester duna nada; completamente contrario na espiritu di e ley mes. Por lo tanto esey no ta un caminda pa prensa y publico haya informacion na un manera agil. Ta di spera cu banda di e proyecto positivo di e mandatario menciona, lo tin atencion tambe pa e banda no aceptable aki.