(Infobae) – Un temporal cu a asota e ciudad Brasileño di Rio de Janeiro y su region metropolitano entre oranan di anochi di diasabra ultimo y marduga di diadomingo a provoca e morto di por lo menos 11 persona y a inunda varios caya, segun autoridadnan local a informa.
Entre e victimanan, tin un homber fayecido pa motibo di tera cu a los y otro dos persona mas pa descarga di coriente, aunke mayoria a muri hoga debi na crecemento di riunan, segun Cuerpo di Bombero di e estado, cu a sigura cu nan a atende cerca di 230 incidente relaciona cu yobida den ultimo 24 ora.
Di mesun manera, un muhe a desaparece despues cu su auto a cay na riu Botas diasabra anochi.
Alcalde di e ciudad mas grandi di e pais aki, Eduardo Paes a decreta un situacion di emergencia na e municipio y a recomenda na ciudadanonan pa evita di sali y keda na un luga sigur.
Yobida den oranan di diadomingo mainta a obliga pa cera caminda importante di e ciudad, manera Avenida Brasil, y a cera algun parada di e metro y di autobus specialmente di zona nort.
Ademas tambe a cera parkenan debi na peliger cu palo por cay, y training di scolnan di samba cu ta preparando pa carnaval tuma luga den aproximadamente un luna tambe a keda cancela.
Inundacionnan tambe a laga un hospital di zona nort sin coriente durante parti di dia, segun autoridadnan local.
Presidente di Brazil, Luiz Inacio Lula da Silva a papia via telefon cu varios alcalde di e region y a garantisa “tur apoyo” di Gobierno Federal y asistencia pa e poblacion afecta, segun un comunicado a indica.
Gobernador di estado di Rio de Janeiro, Caludio Castro, a lamenta loke a sucede cu e personanan fayecido y a bisa cu ta trahando incansablemente “pa evita mas perdida.”
