Aña aki Aruba ta celebrando su di 70 carnaval, y esaki ta trece cune un tiki reflexion riba e origen di e celebracion aki, un di e fiestanan cultural mas grandi y gusta riba nos isla. Den esaki, no por falta e jingle famosisimo cu ta keda na bida sin importa cuanto tempo ta pasa.
Carnaval di Aruba a cuminsa na aña 1954, y for di e epoca aki, ya e cantica cu mas nos ta asocia cu e temporada aki a wordo crea. Un jingle transcendental cu tur hende a apropia como di nos, desde reinanan di Carnaval, grupo y banda, cu ta keda duna un bida nobo na “Carnaval, Carnaval, esta dushi ta Carnaval.”
E cantica aki a wordo crea pa Sr. Rufo Wever, autor y compositor di e exitoso jingle. El a graba e cantica aki hunto cu su amigo, cantante di Sensacion Musical, Sr. Edwin Zichem, na Wilhelminastraat 33, cas di un familiar di Wever.
Segun anecdotanan di e tempo aya ta relata, Wever y Zichem a lubida completamente riba e hecho cu tur cantica ta spera di tin un coro te na momento cu a bay pa graba e cantica. Mirando cu no tabatin mucho tempo pa graba, a pidi Sra. Maria Wever y Sra. Libia Oduber-Wever, rumannan di Rufo, kendenan hunto cu Sra. Fefa Wever, cuña di Rufo, a fungi como corista. Nan tres a bira e famoso cantante tras di e frase tan conoci, “Carnaval, Carnaval, esta dushi ta Carnaval.”
Inmediatamente e cantica a ser toca na tur radio di Aruba y tabatin un acogida enorme, y a gana curason di pueblo di Aruba unda te dia di awe e cantica aki sa di resona.
