Artista visual internacional ta creando arte na Aruba

Su obranan ta exponi na varios estado di Venezuela y na varios ciudadnan rond di mundo manera Miami, Bogota, Houston, Panama, Denver, Madrid, Santo Domingo, Olivares ta bin mustrando su arte cu un enfoke di preservacion y tambe di conscientisacion.

Oscar Olivares ta un artista visual, ilustrador y conferencista Venezolano hopi conoci cu na e momentonan aki ta na Aruba trahando riba un mural cu ta bay ser exponi proximamente na instalacionnan di e hotel Aruba Boutique Art Hotel cu ta bay habri su portanan na april di e aña aki, redactor di Bon Dia Aruba a haya invitacion pa haci un entrevista cu e artista aki door di Fundacion Venearuba Solidaria, esnan encarga di organisa tur e logistica y gira di medio pa Olivares na isla di Aruba pa asina duna di conoce un poco mas su trabou y loke ta su pasion.

El a sigura, cu su bida artistico a cuminsa ora e tabata un mucha cu tabata gusta pinta y crea, su famia tabata duna tur e motivacion pa e por a haci esey “nan tabata bisa mi cu cada dibuho cu mi tabata haci tabata algo increibel y esey a duna hopi siguridad for di chikito, a pesar cu mi tabata bay diferente cursonan di pintura, mi no a caba ni un pasobra pa mi tabata mas importante di por expresa mi mes libremente.”

Ora e tabatin 14 aña el a usa e pintura ey pa expresa su emocionnan, su pasion tambe ta dirigi pa e deporte di futbol y e tabata publica e pinturanan ey riba su rednan social “eynan mi carera a cuminsa y a expande pa loke e ta awendia,” el a bisa.

Olivares como un artista visual, ilustrador y conferencista ta señala cu tur esaki ta vincula na e “gran pasion di expresa bo mes, tin biaha no ta facil manera e ta sigura, cu mester di hopi organisacion y planificacion y ta algo comun entre artistanan pa traha di e forma ey cu ta fundamental pa por logra e obhetivonan y por cumpli cu tur e facetanan ey di e bida.”

Su carera como conferencista a cuminsa cu solicitudnan di diferente scol, universidad y companianan pa e por conta su experiencia, despues e compromiso a bira mas grandi, “pero semper mi a conta mi historia, na final, tur cos ta resumi na sigui bo pasion, haci loke bo ta stima y gusta, tambe compronde cu e bida no ta defini door di e dificultadnan cu nos ta biba sino con nos ta enfrenta nan, ki decisionnan nos ta tuma y con nos reinventa nos mes cu nos capacidadnan y talento, cu por sirbi na nos y na e comunidad cu ta rond di nos.”

Su muralnan cu ta presente na 22 pais rond di mundo y awor na Aruba, pa su persona esey ta nifica un responsabilidad grandi, pa motibo cu ta representa un motivacion y un modelo pa hopi hoben “pa mi ta importante pa sigui representa esey, pero na mesun tempo mi no kier conforma mi mes cu esey, mi ta hoben, ainda ta falta hopi obra pa crea y semper mi mester aspira pa mas, pa sigui genera tecnica nobo, pa sigui genera propuestanan nobo y mi no keda solamente cu loke awe ta tendencia.”

E idea di crea muralnan cu tapanan di plastic a surgi na 2019 cu un NGO na Venezuela di haci un mural cu material reciclable y nan a tuma contacto cu Olivares y puntra si e tabata capaz di crea e mural cu tapanan di plastic, “ma puntra, cu tapanan? Ki locura esey ta? Pero na e momento ey mi tabata na Francia y na un museo mi a wak algun pinturanan di un tecnica unda ma pensa cu si tabata posibel crea arte a base di puntonan di color, cu por mira e tapanan como puntonan di color, kiermen awor bo no ta wak e tapanan manera desperdicio sino asina, mescos ora bo tin cinco stijf y cu nan bo tin cu crea algo, wak e tapanan di e forma aki a habri mi mente na tur e posibilidadnan cu tabata t’ey,” Oliveros a comenta.

Su prome mural y esun di mas grandi te awor unda el a usa mas di 200.000 tapa di plastic, a ser crea na El Hatillo, un municipio di estado Miranda na Venezuela na aña 2020 cu cuatro wacamaya, un diseño di 45 meter di largo unda medionan di diferente parti di mundo a cuminsa publica esaki loke a habri e portanan pa Olivares sigui hiba su obranan na otro partinan rond di mundo.

“Pa mi persona, esaki ta sirbi como algo educativo, pasobra bo ta involucra e comunidad y ta invita nan pa recicla, e ta mustra nos kico nos por haci cu tur e plastic cu ta bin for di lama, pero realmente ta simplemente un parti di hopi cos mas cu humanidad tin cu haci, un mural ta un ayudo memey di hopi iniciativanan cu tin cu haci, pero un mural por inspira na miles di hende pa genera tur e iniciativanan ey, cu si ta suficiente, no claro cu no, pasobra tin hopi pa haci pero ta un prome paso pa algo mas grandi,” el a declara.

Na e momentonan aki, e ta na Aruba creando su prome obra di arte cu tapanan di plastic cu ta bay ta ubica na e hotel menciona caba y el a sigura cu e ta spera cu por ta e prome di hopi mural na isla.

Olivares a informa tambe cu tin mas proyectonan pa haci den aña aki, por ehemplo, su proximo mural ta bay tuma luga na Panama.

Den su opinion, e ta haya hopi great pa crea obranan na luganan hopi cerca di lama, manera Aruba ta ubica, “ pasobra mi ta kere cu tin un mensahe hopi poderoso, mi invitacion ta pa esnan cu na unda nan ta mira algo como desperdicio, tin oportunidadnan scondi, pero esey no solamente ta den e material sino tambe den e forma con bo ta mira esey, e recurso mas importante di Aruba no solamente ta su beachnan, sino tambe e creatividad di e hendenan, mi ta invita nan pa sigui explota e creatividad ey, pa Aruba por ta un muestra di tur e talento ey,” el a finalisa.