(ElNacional) – Pa di nuebe aña consecutivo, Venezuela (0.26) ta ocupa e ultimo luga den e ranking mundial di husticia, segun e Indice di Estado di Derecho desaroya pa e organisacion World Justice Project.
E pais ta ubica den e ultimo 10 luganan, tras di Camboya (0.31), Afganistan (0.32), Haiti (0.34), Republica di Congo (0.34), Nicaragua (0.35), Egipto (0.35), Myanmar (0.35) y Cameroon (0.35).
E paisnan cu miho cualificacion di e lista ta Dinamarca (0.90), Noruega (0.89), Finlandia (0.87), Suecia (0.85), Alemania (0.85), Luxemburgo (0.83), Hulanda (0.83), New Zealand (0.83), Estonia (0.82) y Irlanda (0.81).
Pa elabora e ranking, e organisacion ta evalua diferente factor: e restriccionnan na e podernan gubernamental, ausencia di corupcion. Ademas di un gobierno habri, derechonan fundamental, orden y seguridad, cumplimento regulatorio, husticia civil y husticia penal.
Den e listanan pa factor, Venezuela ta ocupa e siguiente lugarnan: restriccionnan na podernan gubernamental (142); ausencia di corupcion (132); gobierno habri (139); derechonan fundamental (134); orden y seguridad (132); cumplimento regulatorio (142); husticia civil (141) y husticia penal (142).
Acceso a la Justicia a señala: “Pa di tres aña consecutivo, e sistema di administracion di husticia penal Venezolano a ricibi un puntuacion di apenas 0.12 punto. Un dato cu ta revela cu e reformanan administrativo y legal implementa pa e autoridadnan no a rindi nan fruto of por lo menos e ciudadanonan no ta ripara ningun cambio significativo.”
“Pero no solamente e huesnan penal a wordo reproba, tambe e civilnan, aunke e ultimo nan aki por lo menos no a keda di ultimo luga, si no di penultimo. Esey a pesar cu den comparacion cu e rapport anterior nan a perde een tiende punt y a pasa di 0.27 pa 0.26. Segun e rapport di World Justice Project, e huesnan civil di Camboya ta e pionan di mundo,” e organisacion no gubernamental a agrega.
E organisacion a destaca ademas, den posicion contrario, e Finlandes-, Danes- y Singapurensenan ta gosa di e miho husticia criminal. Mientras cu e Hulandes- y Noruegonan tin e miho huesnan civil.
Di mesun manera, na Latino America, e pais nan cu ta comparti e prome luganan den e categorianan señala ta Uruguay, Costa Rica y Chile.
E ONG a señala cu e datosnan di e Indice di Estado di Derecho nobo ta preocupante pasobra nan ta señala 1.500 miyon di persona na henter mundo cu no ta haya ayudo na e tribunalnan pa nan derechonan ni respuesta na nan problemanan.
“Den e porcentahe importante aki di e poblacion mundial tin e 30 miyon di Venezolanonan,” e organisacion a subraya.
Acceso a la Justicia a afirma tambe cu e resultadonan ta confirma cu e medidanan adopta den e ultimo añanan pa e autoridadnan di e gobierno di Nicolas Maduro pa supuestamente mehora e sistema di husticia na Venezuela no ta mas cu puro gestonan simbolico cu no a traduci den resultadonan tangible y concreto.
