Diamars ultimo Secretario di Estado Alexandra van Huffelen, a manda un carta pa Tweede Kamer na unda e ta informa tocante e Agenda di Implementacion di Aruba, Curaçao y Sint Maarten den e prome kwartaal 2024.

Secretario di Estado van Huffelen ta informa cu den e ultimo simannan, e Organisacionnan di Ehecucion di Aruba, Corsou y Sint Maarten, hunto cu e Organisacion di Trabao Temporal di su ministerio, a traha den cooperacion estrecho ariba e Agendanan di Ehecucion cu compromisonan di resultado pa e prome kwartaal di 2024. Asina, tambe den e aña nobo aki ta duna ehecucion, sin disminui, na e reformanan cu ta describi den e tres Landspakketnan.

El a remarca cu e ta sigui e realisacion di e resultadonan desea y e compromisonan di trabou cu ta inclui den e Agendanan di Ehecucion cu hopi atencion. Y ora cu ta necesario, el a indica, e ta discuti e factornan cu ta obstaculisa e progreso durante su reunion periodico cu cada un di e minister president di cada pais.

E Secretario di Estado a indica cu dentro di algun siman, Tweede Kamer lo ricibi un repaso completo di e progreso di e tres Landspakketnan den e periodo anterior den e rapportnan di ehecucion pa e di cuater kwartaal di 2023. Den esaki, el lo informa Tweede Kamer tambe mas detayadamente tocante con e ta wak e progreso den ehecucion di e Landspakketnan y e colaboracion entre nan.

Riba 13 november 2020, Aruba y Hulanda a firma e reglamento mutuo pa e ehecucion di e Landspakket di Aruba. For di e momento cu a firma e reglamento mutuo, e realisacion di un variedad di reforma y inversionnan a cuminsa. E reformanan aki tin como meta contribui na e resistencia y resilencia di e economia y comunidad. E refuerso di e columna financiero y coherencia social ta contribui na esaki.

Den e Landspakket ta inclui medidanan riba e siguiente terenonan: maneho financiero; costo y eficacia di sector publico; belasting; sector financiero; economia; cuido di salud; enseñansa y fortalecemento di e estado di derecho. E acuerdo concreto caminda e medidanan aki ta consisti ta keda registra den un agenda di ehecucion. Aworaki tin e Agenda di Ehecucion pa e periodo di 1 di januari te cu 31 di maart 2024, pues e prome kwartaal di e aña.

Segun e Agenda di Ehecucion, den e prome kwartaal di 2024, lo tuma mas pasonan pa restructura e aparato gubernamental, entre otro, lo determina, a base di un cuadro di evaluacion, cual servicio actual ta ehecuta tareanan fundamental di gobierno. Ademas, lo tin un acuerdo entre proveedornan di cuido di salud di prome y di dos liña pa mehora referencia di ida y buelta, cual ta contribui na calidad y eficacia di cuido di salud. Ademas, ta cuminsa cu e implementacion di e sistema sostenibel di registracion di indicadornan pa enseñansa. E sistema aki lo contribui na decisionnan mas bunita. Por ultimo, tin trabao riba e nombramento y formalisacion di e autoridad di wega di casino, kende lo supervisa e sector aki.

Den e Agenda di Ehecucion aki, e acuerdonan realisa for di e Agenda di Ehecucion 2023-Q4 (kwartaal 4) a disparce, e acuerdonan di e Agenda di Ehecucion 2023-Q4 cu ainda mester realisa, a keda manteni y a sinta cu acuerdonan nobo pa e siguiente kwartaal (2024-Q1). Di e manera aki, ta cla y ta encera cual acuerdo ta valido pa e siguiente kwartaal. E resultadonan pretensioso ta numera asina cu ta cla cu tabatin pasonan prome cu yega na e acuerdonan actual.

Den cuadro cu e Landspakket tambe pa loke ta trata restructuracion di e aparato gubernamental, recientemente Prome Minister Evelyn Wever-Croes a reitira, mediante un comunicado di prensa, e atencion di Gobierno di Aruba pa mehoracion di e aparato gubernamental. El a remarca cu aña 2024 ta un aña importante pa restructuracion di e aparato gubernamental di pais Aruba.

El a indica cu desde inicio di Gabinete Wever-Croes, gobierno a señala cu e aparato gubernamental di pais Aruba mester haya mas atencion, y mester introduci cambionan, entre otro cambionan di digitalisacion. E meta di e cambionan aki, el a enfatisa, ta pa mehora e servicio na ciudadanonan di pais Aruba, y pa trece mas transparencia den e procesonan pa asina tur hende sa kico e procesonan ta. “Esaki lo baha e grado di riesgo pa corupcion tambe,” el a indica den e comunicado.

Manera ta conoci den aña 2022 a cuminsa e trabounan preparatorio, y den 2023 e estudio a inicia pa restructura e aparato gubernamental, pa haci e aparato uno mas agil, mas eficiente, mas transparente y mas confiabel.

E transformacion di aparato gubernamental tambe lo encera ahustacion di e leynan actual. Na mesun momento lo concentra riba e comunicacion efectivo pa e cambionan, pa crea sosten y asina atende cu posibel preocupacionnan di empleadonan publico cu por tin preocupacion pa e consecuencianan di esaki.

E mandatario a splica cu e prome parti di e proceso lo ta pa re evalua tur e tareanan cu gobierno ta ehecuta pa dicidi cual ta e tareanan cu gobierno mester sigui ehecuta, y cual tareanan ya no ta cay bao di nan. Lo propone tambe si mester independisa departamentonan, lo pone atencion riba trabounan cu ta wordo haci dobel den gobierno pa diferente departamento y por ultimo lo pone atencion na e tareanan cu gobierno mester ta ehecutando pero cu no ta haciendo ainda.

Prome Minister a informa cu den cuadro di Landspakket, den colaboracion cu Hulanda, e compania Price Waterhouse Coopers di Hulanda a gana e destaho, ya a cuminsa cu entrevistanan den tur departamento di Gobierno. E pregunta cu lo wordo contesta den e estudio aki ta: cual ta e tareanan cu ta wordo haci awor den gobierno, cu mester wordo haci pa gobierno, y cualnan no. Tambe: cual ta e tareanan cu no ta wordo haci den gobierno awor, pero mester wordo haci pa gobierno.

E conclusionnan di e estudio aki y e recomendacionnan lo wordo entrega na april di e aña aki y a base di e recomendacionnan cu sali di e estudio gobierno lo tuma decision di cual ta e cambionan structural cu lo wordo ehecuta riba termino corto, y cualnan mester mas tempo di preparacion.