Ayera mainta prome cu 12or di merdia diferente medio di comunicacion a reporta tocante un explosion cu a tuma luga riba tereno di refineria di Aruba. E suceso aki a causa basta conmocion, sobre todo pa areanan cercano di e tereno di RdA cu a scucha y sinti e explosion aki.
Inicialmente team di Bon Dia Aruba a tuma contacto cu e minister encarga, Minister Glenbert Croes como tambe oficina di RdA, pa ricibi informacion oficial di kico precisamente ta loke a tuma luga.
Na momento ey a wordo informa cu e instancianan concerni hunto cu e minister tabata den reunion pa discuti e situacion.
Despues di e reunion aki a logra haya contacto cu Minister Croes y a manda algun pregunta pe tocante e caso aki. A puntra e minister si por confirma si ta trata di un truck di fuel ta loke a explota. El a clarifica cu no ta un fuel truck ta loke a explota, pero ta un industrial vacuum truck.
Reportahenan di diferente medio comunicacion a indica cu tin varios persona cu a resulta herida. Minister Croes a confirma cu tres persona a resulta herida pa motibo di e explosion di e industrial vacuum truck.
Bon Dia Aruba a puntra Minister Croes tambe si tin conocemento di kico precisamente a causa e explosion aki. El a informa cu e investigacion ta andando caba y asina cu tin resultado di e investigacion lo comparti e informacion aki.
Por ultimo a puntra kico ta e stapnan cu nan lo tuma aworaki, y el a indica cu un bes e investigacion ta cla, esey lo determina kico ta e stapnan cu nan lo mester tuma pa asina evita cu esaki por sucede un biaha mas.
Ariba red social Facebook varios usuario cu ta biba den e area di San Nicolas, te na districto di Savaneta tambe, a indica cu nan scucha e explosion y a sinti nan vloer, nan cas, tembla completamente pa motibo di esaki.
Hasta riba e pagina di Facebook dedica na turistanan cu ta bishita Aruba, tabatin turistanan cu a comenta cu nan tambe a scucha e explosion y a sinti e temblor pa motibo di e esaki.
E victimanan cu a resulta herida a wordo transporta cu maximo urgencia pa hospital pa asina ricibi e tratamento necesario.
