E aña aki Aruba su carnaval ta marca historia den diferente forma, apart cu e ta celebrando 70 aña, e aña aki ta uno historico ya cu pa prome biaha den 70 aña di carnaval, un mama y yiu ta competiendo e mesun anochi pa e corona di Reina Grandi y Sra. Carnaval.

Jamilyenne Tromp, Reina Grandi Noord/Infinity Carnival Group y Esther Tromp -Tromp, Sra. Carnaval Noord/Infinity Carnival Group ta den full preparacion pa e fin di siman aki di eleccionnan di carnaval.

Den un entrevista cu Bon Dia Aruba, tanto Jamilyenne como Esther ta conta di nan experiencia y con e emocionnan ta pa e anochi final, unda ambos ta competi pa un corona y na mesun momento ta marca historia den Aruba su carnaval.

Jamielyenne ta un enfermera di salud mental na Repsaldo. E ta describi su mes como un hoben hopi lief, spontaan y cu gusta su trabao. For di chikito e gusta carnaval y semper el a participa den paradanan di carnaval.

Semper e tabata kier a bay pa reina pero pa motibo di trabao y scol semper e decision no tabata definitivo, pero e biaha aki si el a tuma e decision pa haci e soño ey realidad.

“Mi ta corda despues di e programa di 11/11, e fiesta di apertura, mi ta corda mi a djis yega cas y mi a topa mi mama cu mi tata den cushina y mi a djis bisa nan ‘Ma, Pa, mi ta bay reina y mi no ta bay papia di esey mas,” el a conta.

Jamilyenne a sigui conta cu siguiente el a lanta, y su mayornan a tum’e hopi den serio, vooral su mama y e mainta ey e team di carnaval tabata na su cas y asina nan a cuminsa. “Mi mama su reaccion tabata cu e no tabata ki pa bisa, pero mi no a dun’e e chance pa bisa algo tampoco. For di eynan nos a cuminsa cu preparacion, nos tabata buscando un dia di coronacion y nos a dicidi pa haciele den Fakkel,” el a agrega.

E emocionnan ta mixto pa Jamilyenne. El a conta cu di un banda e ta sinti hopi emociona, pero di otro banda e ta bay ta nervioso pa sa con su mama su presentacion a bay, y alabes e sa cu e tambe tin cu duna 100% di su banda. Na mesun momento e sa cu su mama tambe ta bay ta nervioso backstage mirando cu su yiu tambe cu tin cu haci un bon presentacion.

Pro ultimo Jamilyenne ta duna su mensahe na comunidad di Aruba: “Ban semper cuida nos salud mental, ban semper keda aporta na cultura di nos Carnaval pasobra si nos mes no aporta, ken ta bay haci’e. No ta importa den cual grupo bo ta, pero aporta na nos carnaval pasobra e ta di nos.”

Esther Tromp-Tromp, ta traha na Inklaring Customs di Douanne. E ta describi su mes como un hende di bon curason, tin biaha te di mas cu tin ora hende ta probecha di esey, pero e ta soport’e. Na mesun momento e ta un hende hopi trankilo, pero cu un mecha hopi cortico.

Esther ta conta cu su participacion pa señora Carnaval a cuminsa na un joke. “Tur cos a cuminsa na un joke, un joke sinta bao dak di cas di mi mama, manera tur dia manera ta custumber. Nan a cuminsa bisa cu ami por bay pa Sra. Carnaval y den joke mi a bisa nan ok, ta bon. Mi a bisa nan ta bon pa nan por a laga mi den paz y trankilidad,” el a conta.

El a sigui conta cu despues di esey un bisiña a pasa na su cas y bisa cu tur cos ta regla caba, cu el a papia cu Jerrino, Naomi y Julissa caba di e grupo di carnaval y nan tabata wardando riba un reunion.

“Ya esey tabata te. Despues di esey mi a gewoon bira loco, mi tabata hopi emociona, te cu un dia nan a bisa mi ta basta, cu mi mester stop di bestel cos pasobra nan no ta bay tin tempo pa usa tur locual mi a pidi,” el a agrega.

Pa esaki ta bay ta prome biaha cu e ta bay subi riba un escenario, y a pesar di tur e emocionnan y, el a bisa cu probablemente esaki ultimo biaha tambe cu e ta haci “e locura aki.”

Pa loke ta e preparacionnan, Esther a indica cu nan a bay all out. E tin un team grandi su tras, y mesun team di dje ta team di su yiu tambe. “Nos ta un famia hopi uni y tur bisiña tambe ta bin yuda. Kiermen nos ta cla,” el a subraya.

Esther ta conta cu e sentimentonan pa e anochi final na unda su mes y su yiu ta bay competi ta hopi nervioso. “Pa mi ta honesto, ora cu mi a yiu a bisa ami cu mi casa cu e ta bay pa reina y no ta bay papia mas di dje, ami no a worry, y pa siguiente mainta mi a haya como 10 hende na mi cas y bisa kico nos ta bay haci,” el a indica.

El a remarca cu su casa ta orguyoso, pero inicialmente, despues cu su yiu a bisa cu e ta bay reina, el a para y bisa cu no, pero despues el a dobla y aworaki e ta all out cu su dos reina.

Por ultimo, Esther ta manda un mensahe special pa comunidad carnavalista di Aruba: “Ban gosa nos Carnaval dushi, alegre, contento, stop cu pleitamento. Mi ta kere den e 70 aña cu tin di carnaval no tabatin un aña den e 70 aña ey cu no tabatin un pleito. Sea ta entre gruponan, sea ta entre SAC y ASOMA, aworaki ta SMAC cu Musica. Te ainda, desde cu mi tin mi tino, no tin un aña cu no tin pleitamento y ami no ta wak esey bon pasobra e ta un temporada pa nos disfruta bida y pa bo ta bringa otro di e forma ey, mi no ta hay’e saludable pa nos carnaval.”