Recientemente, prome minister Evelyn Wever-Croes a emiti un comunicado di prensa pa aclaria informacion tocante permiso di construccion di St. Regis hotel. Den e comunicado, el a bisa cu Marisol Lopez-Tromp a cera un compromiso cu e St. Regis na 2016. Sinembargo, Lopez-Tromp ta aclaria cu na 2016 e no tabata minister di Infrastructura.
“Pa aclaria cualkier duda den comunidad, Prome Minister Evelyn Wever-Croes a duna un splicacion breve riba e tereno cu a ser otorga na St. Regis pa por construi un hotel na Aruba”, Wever-Croes a bisa den e comunicado. Ademas, el a bisa cu “na 2016, tempo cu Sra. Marisol Lopez-Tromp tabata minister di infrastructura, el a cera un compromiso cu St. Regis, cu a indica di ta interesa pa construi un hotel na Aruba, consistiendo di 308 camber.”
Bon Dia Aruba a tuma contacto cu Lopez-Tromp pa pidi su reaccion. “Na 2016 mi no tabata minister di Infrastructura,” Lopez-Tromp a indica. “Esun cu tabata minister di Infrastructura despues cu ami a baha na 2009 ta Benny Sevinger bao gobernacion di AVP. Na 2016 e tabata minister di Infrastructura, y despues di dje, desde 2017, ta Otmar Oduber.”
Bon Dia Aruba a puntra Lopez-Tromp si esaki ta nifica cu e no tabata involucra den e acuerdo cu St. Regis, pero te ciere di e edicion aki, no a ricibi un contesta.
