Ayera mainta, durante un prome conferencia di prensa pa e aña aki, politico Otmar Oduber a trece dilanti diferente topico, entre otro, a papia un biaha mas tocante un dialogo nacional cu su persona ta bay solicita na prome minister Evelyn Wever-Croes.
Ayera Oduber a informa cu mediante su plataforma denomina “Reforma Pais,” cual no ta un partido politico segun el a sigura, el a haci publico un solicitud dirigi na prome minister Evelyn Wever-Croes pa asina inicia un dialogo nacional riba gastonan di gobierno, “pero esey mester bin como iniciativa di prome minister.”
Sinembargo, esey no ta kita cu otro lidernan den comunidad tambe por haci e iniciativa aki na unda Oduber ta spera cu den e dialogo aki tur hende por participa, oposicion tambe pa nos por realisa cu gobernacion ta fia bo ta fia stoel ey un rato, pero despues di cuatro aña no por ta asina cu nos ta continua y esey ta loke nos plataforma ta para pe, riba cambionan y con ta defende e bienestar di gobierno caminda cu nos ta bay introduci leynan cu no ta existi mas pa periodo di cuatro aña y bo ta tuma un decision, no por endeuda por ehemplo, pais Aruba pasobra a mi ta cuatro aña den gobierno pero mi ta endeud’e pa 20 aña, cambionan mester bin den ley cu na momento cu bo ta mara Aruba na mas cu cinco aña den cualkier contract financiero, bo mester tin un mayoria absoluto di parlamento,” Oduber a señala.
Segun su opinion, e dialogo social nacional mester tuma luga lo mas pronto posibel pa motibo di decisionnan cu ta tuma luga of medidanan cu por ser introduci atrobe.
Tambe, el a papia tocante e supuesto intencion cu gobierno tin pa bolbe cobra turista 20 dollar pa atende cu e problema di RWZI. “ATA a aumenta su levy di 9.5% pa 12.5% aña pasa y nos no a atende ni un hende papia di dje, dicon? Pasobra esey ta produci 60 miyon florin pa gobierno, no pa ATA y tampoco ta bay pa beneficio di turismo. Por a saca e placa di eynan pa atende cu e problema di RWZI, awor ta bay bolbe haci Aruba mas caro,” el a bisa.
E yamada pa dialogo nacional ta bay keda haci unda Oduber a bisa cu den proximo dianan e ta bay manda e peticion na prome minister y tur lidernan di comunidad, manera sindicato y gremio, “pa motibo cu no por warda te ora un proximo discusion di medidanan bin pa por tende atrobe cu gobierno mester baha gasto, sino cu mester ta awor.”
