(AP) – Taiwan su Ministerio di Defensa a mal traduci un alerta den Ingles riba diamars y a bisa cu China a lansa un misil na luga di satellite, urgiendo cautela dianan prome cu eleccion riba e isla.
Taiwan lo tin eleccion presidencial y parlamentario diasabra cual China a describi como un escogencia entre pas y guera. E alerta bilingue manda na e residentenan su telefon a pidi cautela den Ingles pa motibo cu a reporta cu tin un misil. E Ministerio di Defensa despues a haci un declaracion unda a pidi despensa na e publico pa e mal traduccion den Ingles y a clarifica cu ta un racket cargando satellite y no misil a ser lansa.
Media di China a reporta cu e pais a lansa un satellite yama Einstein cu un racket for di Xichang Satellite Launch Center na Sichuan. CCTV a informa cu e satelite a drenta orbito y cu e lansamento tabata un exito. E alertanan a zona den medio di un conferencia di noticia di Minister di Exterior Taiwanes Joseph Wu. El a clarifica cu e tabata un lansamento di satelite y a bisa e reporteronan pa no preocupa y sigui cu e conferencia. “Nos mester keda responsabel, nos mester keda modera pa asina nos por preveni conflicto entre China y Taiwan,” el a declara.
President di Taiwan Tsai IngWen a urgi e publico pa no preocupa segun media local.
Beijing a intensifica su acoso militar di e isla habita pa 23 miyon persona den e lunanan recien, mandando barco militar y aeronavenan casi diariamente. Beijing tambe a ser mira ta lansa blaasnan, cual tin sospecha ta ser usa pa spionahe rond di e isla a pesar di kehonan pa cu esaki.
